- Ўйин жуда қизиқарли ва мухлисларбоп ўтди. "Навбаҳор" - яхши жамоа, зўр мураббийга эга, ўзининг ўйин услуби бор. Ўз навбатида бизнинг ҳам ўзимизга ҳос принципларимиз бор ва шуни ушлашга ҳаракат қилдик. Бугунги ўйин борасида йигитларга эътирозлар кам, бугун улар кўп меҳнат қилишди ва яхши ўйнашди деб ўйлайман. Бошқа вазиятларда бизда вазиятларни якунлаш сифати оқсади.
- "Сурхон"нинг ўйинида жаҳон чемпионатидан кейин қандай ўзгаришлар бўлди?
- Албатта, ўзгаришлар бор. Бизда иқтидорли ёш футболчилар чиқиб келишяпти ва уларга имконият бериляпти. Бундай ўйинлар орқали футболчиларга катта юкламалар тушяпти. Чунки биз тўртта ўйин ротация қилганимиз йўқ. Шу ўйинга келиб, футболчиларга чарчоқ билинди. Талабларимиз ҳам ўзига яраша ва юкламалар ҳам катта. Шу сабабли бугунги ўйинда ротация қилишга қарор қилдик. Ёшларга имконият берилди ва улар ўзларини кўрсатишди. Келаси ўйинларда ҳам ротация қилишимиз керак бўлади. Чунки мавсум жуда зич. Ротация бу янгилик эмас, буни бажариб туриш керак. Бунинг учун захира ўриндиғидаги футболчилар ҳам яхши бўлишлари керак.
- Сўнгги вақтларда ўз майдонида ўйнамаётган "Сурхон" кўп танқид қилинмоқда. Жамоа уйига боришни истамаётгандек. Сурхондарёдаги вазият қанақа?
- Бизда шундай гаплар айтадиган ақлли инсонлар жуда кўп. Стадионимиз тайёр бўлмаса, қаердадир ўйнашимиз керакку? Масалан Сурхондарёда ўзимизнинг 15 минг мухлис қаршисида, бизга мухлислик қиладиган инсонлар ёнида футбол ўйнаган маъқулми ёки Наманганга келиб, 15 минг наманганлик мухлисларнинг "Навбаҳор"га мухлислик қиладиган жойда ўйнаган маъқулми? Буни ўйлаш учун кўп ақл керак эмас. Бундай гапларни гапирадиган инсонлар жуда кўп. Барчанинг ўз виждонига ҳавола. Биз ҳам уйимизда ўйнагимиз келади. Ўз уйингда деворлар ҳам ёрдам беради деган гап бежизга эмас. Бу нарса анча йиллардан бери ўз тасдиғини топган. Ўзбекистонда энг иссиқ жой Термиз бўлса керак. Тошкентда "Пахтакор" стадионида 3 ойда чим қандай ҳолатга келиб қолганини барча кўрди. Лекин Термизда ундан ҳам иссиқ. Бу нормал ҳолат ва бу бизнинг назоратимиз остида эмас. Ўз мухлисларимиз қаршисида ўйнаб, уларнинг олдида яхши кайфиятда бўлиш бизга ҳам ёқади. Бу керак эмас гап. Бу гапнинг маъноси ҳам йўқ. Масалан Тошкентдаги бирор стадионни уй стадиони қилсак ҳам тушунса бўларди. Лекин биз "Динамо" майдонида ўйнадик, мана мезбон бўлиб, "Навбаҳор" стадионида ҳам ўйнадик. Лекин ўз майдонимиз тайёр бўлмаса, нимадир қилишимиз керак. Насиб қилса, Тошкентдаги бирор стадионда уй ўйинларини ўтказамиз. Лекин бу ҳам бизнинг қўлимизда эмас. Барчасини тўғри тушунишимиз керак.
- Жамоани Сурхондарёга қайтариш бўйича вазият қандай?
- Ишлар давом этяпти. Бу бир кунда бўладиган иш эмас. "Пахтакор" стадионига ҳам қанча пул кетди ва мана майдон дабдала ҳолатда. Табиат инжиқликларини тўғри тушуниш керак. Жуда қийин бу, барчасини тўғри қабул қилиш керак. Одамлар ўз рейтингини ошириш учун хайп қилишмоқда. Биз тарафдан одам бўлса, бу гапни гапира олишмасди, менимча.
