- Ўйин ҳақида фикрингиз?
- Биринчи навбатда рақибни ҳақли ғалаба ва кейинги босқичга чиққани билан табриклайман. Бу ўйин бизга дарс бўлди, ўзимиз учун керакли хулоса чиқаришга ҳаракат қиламиз. Стадионга жамоамизни қўллаб туриш учун келган мухлисларга раҳмат. Ижобий натижа кўрсатишга ҳаракат қилдик. Эндиликда ўз ўйинимизни янада яхшилаш устида иш олиб борамиз.
- "Каттақўрғон"да яқинда иш бошладингиз. Жамоага келишингиз қандай рўй берди?
- Менга таклиф тушди, таклифни қабул қилдим ва келдим.
- Ўз олдингизга қандай мақсад қўясиз?
- Жамоамиз билан Суперлигага чиқиш. Бунинг учун ҳар бир баҳсни ютишга ва якунда биз учун керакли бўлган ўринни олишга ҳаракат қиламиз. Тўғри, бугунги йирик мағлубиятдан кейин бу гапларим ғалаати эшитилиши мумкин, лекин Пролигада шундай вазифа қўйилган.
- Ҳамюртимиз Вагиз Галиулин билан "Рубин"да ишлаганингиздан хабаримиз бор. Бундан ташқари ўзбек футболи борасида қандай маълумотга эгасиз?
- Галиулиндан ташқари Даврон Мирзаев ҳам жамоамизда ўйнаган. Маълумотга келсак, тез орада кўпроқ маълумотга эга бўламан деб ўйлайман. Ўзбек футболи техникага таянган ҳолда ривожланиб бораётганини кўряпмиз. Терма жамоага Жаҳон чемпионатида омад тилайман. Бундан ҳаммамиз хурсандмиз. Россия учун Ўзбекистон бегона эмас, биз қўшнилармиз. Шу боис кўпчилик Ўзбекистонга мухлислик қилади.
- Бугун жамоангиз уч нафар марказий ҳимоячи билан ўйнади. "Каттақўрғон" аввалги баҳсларда тўрт нафар ҳимоячи билан ўйнаб келаётганди. Тактикани ўзгартирдингизми?
- Шуни айтишим мумкин, агар 4 нафар ҳимоячи билан ўйнаганимизда ҳисоб янада йирик кўриниш оларди.
- Ўз пайтида дарвозабон бўлгансиз. Жамоангиз учта гол ўтказганига қараб дарвозабон хатоси бор деб ўйлайсизми?
- Мен кўпроқ тактик хатолар ҳақида гапиришни хоҳлайман. Алоҳида бирорта ўйинчи ёки дарвозабонга айбдор сифатида қарамайман. Бугун биз рақиб олдида кучсиз эдик. Бир нечта хатоларга йўл қўйдик. Тез орада хатолардан хулоса чиқариб чиройли ўйин кўрсатишни бошлаймиз.
- "Каттақўрғон" уй учрашувларини ўтказадиган Самарқанддаги стадионда бўлдингизми?
- Ҳозирча йўқ. Мен тўғри Тошкентга келдим ва жамоани шу ерда қабул қилиб олдим.
