Шу ҳафта «Реал» ва Винисиус Жуниор вакиллари ўртасида 2027 йилнинг ёзигача мўлжалланган шартномани узайтириш бўйича ҳал қилувчи учрашув бўлиб ўтади.
Аввалроқ «Реал» 26 ёшли вингерга йилига 22 миллион евро маош таклиф қилгани, бироқ бразилиялик 30 млн истаётгани хабар қилинганди. Бундан ташқари, футболчи «Мадрид» билан шартномасини узайтиргач, ўз имиж ҳуқуқларига 100% эгалик қилишни хоҳламоқда ва Килиан Мбаппеники каби кўтарма пул талаб қилмоқда.
ESPN клубдаги манбасига таяниб, томонлар ўртасидаги учрашув чоршанба куни бўлиб ўтиши кераклигини маълум қилди. Футболчи томонидаги манба эса учрашувнинг аниқ кунини айтмаган ҳолда, унинг шу ҳафтада ўтказилишини тасдиқлади.
«Реал»да бош скаут Хуни Калафат Винисиус билан янги шартнома имзолаш тарафдори. «Қаймоқранглилар» ўзларининг сўнгги таклифини оширмаслиги, ўйинчининг талаблари ва клуб шартлари ўртасидаги тафовут эса жиддийлигича қолаётгани таъкидланмоқда.
Манбаларнинг нашрига маълум қилишича, футболчи ва унинг агентлари янги шартнома Винисиуснинг фаолиятида ҳал қилувчи аҳамиятга эга бўлишига ишонмоқда. Уларнинг фикрича, «Мадрид» бразилияликнинг 2018 йилдаги трансферидан буён клуб ривожига қўшган ҳиссасини, жумладан, Чемпионлар Лигасининг иккита финалида урган голларини ҳам инобатга олиши керак.
Шунингдек, манбанинг ESPN'га хабар беришича, агар шартномани узайтиришнинг иложи бўлмаса, ўйинчининг амалдаги келишуви тугашига атиги бир йил қолганига қарамай, «Реал» Винисиус учун тахминан 150 миллион евро олишни мўлжалламоқда. Бразилия терма жамоаси футболчисига «Арсенал» жиддий қизиқиш билдирмоқда.
