- Ўйин менга ёқди. Йигитлар сифатли ўйин намойиш қилиб беришди. "ҚМУ Жайхун" жамоаси мени яхши томондан ҳайрон қолдирди, улар яхши ҳаракат қилишди. Биз пешқадам сифатида кейинги босқичга чиқдик, бу яхши сигнал. Олти ойдан бери қандай шароитларда ишлаётганимиз, яшаётганимизни барча билади. Йигитлар бунга қарамаган ҳолда ўз ишларини профессионал даражада бажаришмоқда. Балки бу йигитларни ҳам кимдир эшитиб, ҳаётий муаммоларида ёрдам берар.
- "Бунёдкор"нинг икки ойдан кейинги келажагини қандай кўряпсиз? Эшитишимизга қараганда бир қанча етакчи футболчиларда таклифлар бор. Молиявий аҳвол эса оғир.
- Энди менинг ҳам саволим бор. Журналист сифатида бизнинг келажагимизни қандай кўряпсиз?
- Барча нарса бўлиши мумкин. Менга бош мураббий сифатида Сизнинг гапингиз муҳим.
- Билмадим, нима бўларкин... Футболчилар, мураббийлар штаби ўз ишларини қилишди. Раҳбарият вазиятдан чиқиб кетиш йўлларини қидирмоқда. Футболчилар, ишчиларга кичик бўлса-да, ёрдам бериб туришибди. Лекин 5 ойдан бери маош олмаяпмиз, ҳисоб. Ҳозирча буни ҳеч ким тиклаб бера олмаяпти. Футбол ичидаги одамлар ушбу ҳолатга эътибор қаратишини истаган бўлардим. Мен шунчаки бош мураббийман ва бошқа ҳеч нима қила олмайман. Бу йигитлар учун катта меҳнатимиз сингди, уларни шунчаки тарқатиб юбориш эса... Ёш ва иқтидорли футболчиларни йўқотиш ҳам ачинарли ҳолат. Билмадим, кўрамиз...
- "Бунёдкор" футболчиларига бошқа клублардан таклифлар бор. Клуб бу борада қандай йўллар тутади?
- Оғир кунларда биз, яъни, футболчилар ва мураббийлар ўз ишимизни қилдик. Лекин футболда саҳна ортида катта жамоа ишлайди. Масалан, жамоа массажчилари, маъмурларини клуб бир амаллаб ушлаб туришибди. Бу борада раҳбариятга миннатдорлик билдираман. Ўз навбатида мураббийлар штабида биргаликда меҳнат қилаётган инсонлар Алексей Николаев, Бобур Зуҳриддинов, италиялик мураббийларга ҳам раҳмат айтаман. Йигитларга ҳам раҳматимни айтиб ўтмоқчиман, улар мураббийлар штаби қўйган йўлни тўғри деб ҳисоблашди ва қўлларидан келганча ҳаракат қилишди. Мен уларга фақатгина энг яхшиларини тилайман.
- Энди барчамиз терманинг мундиалдаги ўйинларини кузатамиз.
- Бироз дам олиб, ҳаммамиз Ўзбекистон терма жамоасига мухлислик қиламиз. Сабрсизлик билан биринчи ўйинни кутяпмиз. Термага, Фабио Каннаварога, унинг ёрдамчиларига, мухлисларга омад тилайман, барчамиз чин юракдан уларга мухлислик қиламиз, ишонамиз. Барчамиз хатолар, меҳнат эвазига ўсамиз. Ҳудо терма жамоамизга яхши кунларни тайёрлаб қўйган бўлсин. Бу бир томондан ўзбек футболи учун катта туртки бўлиши керак. Биз Жаҳон чемпионатига чиқдикми, футболимиз ўсиши керак. Шунингдек, айнан Жаҳон чемпионати йилида барчамиз йилни яхши якунлаб қўяйлик.
