22 ёшли футболчи 60-дақиқада Наримонжон Аҳмаджонов ўрнига ўйинга қўшилди, бироқ 84-дақиқада унинг ўрнига Сардор Абдунабиев майдонга туширилди.
"Мавлонқулов, адашмасам, ФИФАга хат ёзди. Маош ололмаётгани сабабли кетиши ҳақида хабар берган. Лекин у буни ўйиндан икки кун олдин ёзди. Мен ўз футболчиларимга ишонаман ва бундай нарсаларга эътибор бермасликка ҳаракат қиламан. Уни жамоага ёрдам берсин деб майдонга туширгандим. Лекин уни айблай олмайман, чунки у "Бунёдкор"га ўйнаш ва пул ишлаш учун келган профессионал футболчи. Руҳий жиҳатдан уни тушунишим мумкин. Унга қийин бўлганини ва руҳан ўйинга кириша олмаганини кўрдим. Бошқа йигитлар эса ҳаракат қилиб курашишди. Шунинг учун жамоа манфаати йўлида шундай қарор қабул қилдим. Ҳамма футболчилар курашмоқда, Самандар эса катта эҳтимол билан бир оёғи билан бошқа жамоада. Бу ерда қўрқинчли нарса йўқ, биз ёш футболчилар билан олдинга интилаверамиз", деди 44 ёшли мутахассис.
