Унда “Насаф” бош мураббийи Рўзиқул Бердиев ва ҳимоячи Ғолиб Ғайбуллаев иштирок этди.
“Ўйлайманки, тайёргарлигимиз етарлича бўлди. Йигитларга рақиб тўғрисида тўлиқ ахборот бердик. Имкон қадар яхши ўрганишга ҳаракат қилдик. Қолаверса, ўтган йили Элит ОЧЛда бу жамоа билан ўйнагандик. Қанчалик кучга эгалигини яхши биламиз. Ўйлайманки, йигитларимиз ҳар тарафдан бу ўйинга тайёр. Бу турнирдаги иккинчи ўйиниз. Ҳаммаси олдинда. Икки жамоанинг ҳам бу турнирдаги мақсади жиддий. Гуруҳдан чиқиш учун очко йиғиш керак бўлади. Бунинг учун эртага албатта икки жамоа ҳам бор кучи билан ҳаракат қилади. Асосийси, биз ўз ўйинимизга эътибор қаратишимиз керак. Эртага мухлисларнинг ташрифи яхши бўлади. Мухлисларимиз билан биргаликда футбол учрашувини байрамга айлантиришга ҳаракат қиламиз”, – деди Бердиев.
“Эртага қийин ўйин кутиб турибди. Биз тайёргарлик кўрган вақтимиз битта ўйинчига эмас, умумий жамога қарши ўйинга тайёргарлик қиламиз. Тўғри, маҳоратли ўйинчилари бор. Уларни тўхтатамиз деган умиддамиз. Жамоамизда кайфият ҳам яхши. Мухлисларимизнинг олдида ғалаба қилиб, уларни хурсанд қилишга уринамиз”, – деди Ғайбуллаев.
- Сиз рақиб жамоани яхши ўрганадиган мураббийлар сирасига кирасиз. Ҳар қандай рақибнинг кучли ва кучсиз томонлари бўлади. Уларнинг кучсиз томонларини топа олдингизми?
- Биласизми, бу жамоани ўрганганиш озгина қийинчилик туғдирди. Машҳур ўйинчилари бўлмаса ҳам кўп легионерларга эга жамоа экан. Баъзи бир футболчиларини кам ўйин амалиётига эга бўлгани учун тўлиқ ўрганиш имконияти бўлмади. Чунки бешта тур ўтказди ва Кубок ўйинларини ўйнади. Ҳар хил таркибда, ротация қилган ҳолда тўп тепди. Шунинг учун ҳозир бу жамоанинг аниқ бир таркиби йўқ. Эртага мана бу футболчилар билан тўлиқ таркибда чиқади, деган бир аниқ кўрсатма бермадик. Лекин ҳар бир ўйинчи ҳақида, захира ўйинчисими ёки асосий таркиб ўйинчисими, йигитларга кучли-кучсиз тарафини ўрганишга, етказишга ҳаракат қилдик.
Бу жамоада сотиб олинган легионер ўйинчилар бор, маҳаллийлаштирилган ўйинчилар бор. 20 га яқин легионери мавжуд экан. Бу дегани эртага биз кўпроқ легионер бўлган ўйинчиларга қарши майдонга чиқамиз.
Ўйлайманки, йигитларга етарлича информация бера олдик. Бу жамоанинг кучли тарафини ёки кучсиз тарафини аниқ биламиз. Кучли тарафини ёпишга, кучсиз тарафидан фойдаланишга ҳаракат қилишимиз керак бўлади. Бу турнир ўзи маҳоратли жамоалар, кучли жамоалар қатнашадиган турнир. Бу ерда сиздан тартиб ва эътибор талаб қилинади. Керакли жойда ҳимояда ҳам, ҳужумда ҳам маҳорат кутилади.
- Бугунги кунда жамоа аъзолари U-23 терма жамоаси билан мусобақада қатнашиб, анча кўникмага эга бўлди. Сиз қандай фикрдасиз, ҳозир ёшлар халқаро ўйинларга қанчалик тайёр?
- Уларга тўлиқ ишонамиз. Бекорга уларга бу йил кўп имконият бермадик ва асосий таркиб билан ўзи улар шуғулланиб, маҳоратини ошириб бориши ҳам улар учун катта мактаб, катта тажриба. Ўйлайманки, ҳозирги ҳолатда ҳам уларни бемалол қўрқмасдан қўйишимиз мумкин. Улар келажакда жамоамизга фойда келтиради. Бундан жуда хурсандмиз. Ўйинчиларимиз Олимпия терма жамоасида ҳам ўзини яхши тарафдан кўрсатди. Бу дегани янги авлод тайёр бўлиб келяпти. Тўрттала футболчимиз ҳам муҳим ўрин эгаллайдиган ўйинчи бўлса, албатта жамоамизни муваффақиятли деб ҳисоблаймиз. Ўша мақсадда йигитларга имконият беряпмиз, тажрибасини оширяпмиз.
- Ғайбуллаевга савол. Жамоадошларингизнинг тайёргарлиги ва кайфияти ҳақида маълумот бера оласизми? Сизлар учн натижа муҳимми ёки мухлислар учун чиройли ўйин кўрсатишми?
- Албатта, жамоадошларимнинг кайфияти яхши. Биласиз, бундан олдинги ўйинларда ижобий натижалар қайд этдик. Вазиятдан келиб чиқиб ҳам чиройли, ҳам натижа учун ўйнаймиз.
Эслатиб ўтамиз, “Насаф” – “Ал Ваҳда” учрашуви 14 октябрь куни Қаршидаги “Марказий” стадионида 18:45 да старт олади.
