Чорак финалда тўртта қизиқарли жуфтлик бор. Франция Марокашга қарши майдонга тушса, Испания Бельгия билан куч синашади. Англияни сенсацион тарзда Бразилияни мусобақадан чиқарган Норвегия кутиб турибди. Аргентина эса интизомли ўйини билан ажралиб турган Швейцарияга қарши баҳс олиб боради.
Франция — Марокаш (9 июль, 01:00)
Франция I гуруҳида биринчи ўринни эгаллаб, плей-оффга йўл олди. Французлар 1/16 финалда Швецияни 3:0 ҳисобида ишончли тарзда мағлуб этди, нимчорак финалда эса Германияни мусобақадан чиқарган Парагвайни ортда қолдириб, чорак финалга чиқди.
Марокаш С гуруҳида иккинчи ўринни олган бўлса, плей-оффда аввал Нидерландияни пенальтилар сериясида енгди, кейин эса Канадани мағлуб этиб, яна бир бор ўзининг кучли жамоа эканини исботлади.
Франция ҳозирча мусобақада энг барқарор ўйин кўрсатаётган терма жамоалардан бири. Ҳужумда имкониятларни яхши яратаётган бўлса, ҳимояда ҳам рақибларга деярли имконият бермаяпти. Марокаш эса аввалги мундиалдаги услубидан воз кечмаган. Африкаликлар тўпни рақибга беришдан қўрқмайди ва ўз имкониятини қарши ҳужумларда қидиради. Бу тактика Нидерландия ва Канадага қарши ўзини оқлади.
Бу баҳсда биринчи гол катта аҳамиятга эга бўлиши мумкин. Агар Франция ҳисобни эрта очса, Марокаш олдинга чиқишга мажбур бўлади. Аксинча, ҳисоб узоқ вақт очилмаса, босим французларга ўта бошлайди. Марокаш бугунгача икки кучли рақибни мусобақадан чиқарди ва энди яна бир фаворитни тўхтатишга ҳаракат қилади.
Испания — Бельгия (10 июль, 00:00)
Испания H гуруҳида биринчи ўринни эгаллади. 1/16 финалда Австрияни 3:0 ҳисобида мағлуб этган испанлар нимчорак финалда Португалияни ортда қолдириб, чорак финалга чиқди.
Бельгия эса G гуруҳида биринчи бўлди. Плей-оффда Сенегални 3:2 ҳисобида енгган бельгияликлар кейинги босқичда АҚШни мағлуб этиб, мусобақани давом эттирмоқда.
Бу жуфтликда ўйин услублари кескин фарқ қилади. Испания тўпни назорат қилишга ва рақибни ўз ярим майдонида ушлаб туришга ҳаракат қилади. Бельгия эса имконият туғилганда тез ҳужумга ўтишни яхши билади. Шунинг учун испанлар тўпга кўпроқ эгалик қилса ҳам, хавфли вазиятлар ҳар икки дарвоза олдида юзага келиши мумкин.
Испаниянинг асосий устунлиги жамоавий ҳаракатда. Бельгия эса тажрибали футболчиларига таянади. Агар ўйин юқори суръатда кечса, бу бельгияликларга қўл келиши мумкин. Испания эса баҳсни ўз темпида ўтказишга ҳаракат қилади.
Норвегия — Англия (11 июль, 02:00)
Норвегия I гуруҳида иккинчи ўрин билан плей-оффга чиқди. Аввал Кот-д'Ивуарни 2:1 ҳисобида мағлуб этган европаликлар нимчорак финалда эса мусобақанинг асосий фаворитларидан бири Бразилияни ортда қолдириб, чорак финалга чиқди.
Англия L гуруҳида биринчи ўринни эгаллади. Плей-оффда ДР Конгони, кейин эса Мексикани мағлуб этиб, ўз олдига қўйилган вазифани бажариб келмоқда.
Норвегия бу мундиалда жуда тартибли ўйин кўрсатмоқда. Жамоа ҳимояда ортиқча таваккал қилмайди ва ҳар бир имкониятдан фойдаланишга ҳаракат қилади. Бразилияга қарши баҳс бунинг яққол исботи бўлди. Англия эса рақибга босим ўтказишни яхши кўради ва ҳужумда анча фаол ҳаракат қилади.
Бу ўйинда Англия кўпроқ ташаббус билан ҳаракат қилиши мумкин. Аммо Норвегиянинг сенсация қилиш қобилиятини энди ҳеч ким инкор эта олмайди. Агар англияликлар имкониятларидан фойдалана олмаса, баҳс яна қўшимча вақтгача чўзилиши эҳтимолдан холи эмас.
Аргентина — Швейцария (11 июль, 06:00)
Аргентина J гуруҳида биринчи ўринни эгаллади. Плей-оффда аввал Кабо-Вердени 3:2 ҳисобида мағлуб этди, нимчорак финалда эса Миср тўсиғидан ўтиб, чорак финалга чиқди.
Швейцария В гуруҳида иккинчи бўлди. Кейин Жазоирни 2:0 ҳисобида енгди ва нимчорак финалда Колумбияни мусобақадан чиқариб, саккизликка кирди.
Аргентина ҳозирча ҳар бир ўйинда ҳужумда ўз имкониятларини ярата олмоқда. Бироқ ҳимояда баъзи муаммолар ҳам кўзга ташланди. Швейцария эса аксинча, ҳимояда жуда ишончли ўйнамоқда ва рақибга бўш ҳудуд қолдирмасликка ҳаракат қиляпти. Шу сабабли Аргентия учун бу ўйин аввалгиларига нисбатан анча қийин кечиши мумкин.
Аргентина фаворит ҳисобланади, аммо Швейцария плей-оффда осонликча таслим бўлмайдиган жамоа эканини кўрсатди. Агар швейцарияликлар ҳимоядаги тартибни сақлаб қолса, учрашувнинг тақдири битта эпизод билан ҳал бўлиши ҳам мумкин.
ЖЧ-2026'ни Allplay'да томоша қилинг — CHAMPIONATASIA промокоди билан 45 кун бепул
Промокодни фаоллаштириш ҲАВОЛАСИ
