Футболчининг таъкидлашича, жамоадаги барча футболчиларнинг асосий мақсади финалга чиқиш бўлган. Шу боис учинчи ўрин учун ўйнаш ҳеч кимни қувонтирмайди, аммо миллий жамоа олдидаги масъулият барибир биринчи ўринда туради.
"Биз Франция терма жамоаси учун ўйнаш мажбуриятига эгамиз. Бизнинг ўрнимизда бўлишни истайдиганлар жуда кўп. Лекин ростини айтсам, ҳеч биримиз бу ўйинда қатнашишни истамаймиз, чунки орзумиз финалда ўйнаш эди. Шунга қарамай, ўз бурчимизни охиригача бажаришимиз керак", - деди Конате.
Ҳимоячи шунингдек, мазкур учрашув Дидье Дешам учун Франция терма жамоаси бош мураббийи сифатидаги сўнгги баҳс бўлишига ҳам тўхталди.
"Аввало, биз ўзимиз учун ғалаба қозонишни хоҳлаймиз. Шу билан бирга, буни Дидье Дешам учун ҳам амалга оширишни истаймиз. У Франция футболи ва биз футболчилар учун жуда катта иш қилди. Бугун Жаҳон чемпионатида иштирок этаётганимиз ҳам унинг бизга ишонч билдиргани туфайли. Биз ундан миннатдор бўлишимиз керак.
Агар таркибда ротация бўлса, вазият ўзгариши мумкин. Аммо майдонга тушган ҳар бир футболчи ғалаба учун курашади. Бу Франция ва Англия ўртасидаги баҳс. Бу рақобат катта тарихга эга. Биз шу тарихни, миллий гербимизни ва стадионга келадиган мухлисларимизни ҳурмат қилишимиз шарт", - дея қўшимча қилди Конате.
Эслатиб ўтамиз, Франция ва Англия терма жамоалари ЖЧ–2026нинг учинчи ўрин учун баҳсида ўзаро тўқнаш келади. Бу учрашув Дидье Дешамнинг Франция миллий жамоаси бош мураббийи сифатидаги сўнгги расмий ўйини бўлади.
