Вадим Абрамов: “Афсуски, ҳар доимгидек гол уриб, дарвозамиздан тўп олиб чиқяпмиз. 4:0 ҳисоби пайтида кўплаб голли вазиятларга эга бўлдик. Футбол ҳайратланарли нарса, 4:0ни ҳисоби 4:2га айланиб кетди. Кубок билан хайрлашдик, энди бор эътибор чемпионатга қаратилади”.
- “Динамо” аввалги баҳсларда бугунгидек яхши ўйнай олмади. Олдинги учрашувларда футболчилар бугунгидек мотивацияга эга эмасдек кўринганди. Қайси ўйин ҳал қилувчи бўлди деб ўйлайсиз?
- “Ғазалкент”га қарши баҳсдаги об-ҳавони эсласангиз керак. Ўша шароитда кимнинг нияти кучлироқ бўлса ўша ютарди. Тушунарсиз 3 та гол ўтказиб юбордик. Нимаям дердик…
- “Локомотив” “Динамо” каби кетма-кет голлар урди. Тошкентдаги баҳс шундай кўриниш олишини кутганмидингиз?
- Бундай вазиятга тушиб қолганимизга ўзимиз айбдормиз. Тошкентда ҳам ғалаба учун интилдик, аммо сўнгги дақиқаларда дарвозамиз ишғол қилинди. Куч етмаяпти эмас, тўғри ўйнай олмаяпмиз.
- Жалолиддин Жумабоев йўқлиги ҳақида нима дея оласиз?
- У “Машъал” билан баҳсда жароҳат олганди, “Ғазалкент”га қарши учрашувда жароҳатни оғирлаштириб олди. Энди тикланиш учун кўпроқ вақт керак бўлади.
- 4:0 вақтида ҳаммаси “Динамо”ни қониқтирарди. Нега тўпни кўпроқ ушлаш ҳақида кўрсатма бермадингиз?
- Мен шу ҳақида роса бақирдим. Дембелега керак эмас дея айтдим. Бир-икки имкониятдан фойдалана олмаганимиздан сўнг футболчиларимизда азарт пайдо бўлди ва бундай вақтда бош ишламайди.
- Мавсум муваффақиятсиз ўтяпти дейиш мумкинми?
- Албатта, бу қачонгача эканлигини билмайман. Самарқандга футбол керак эмасдек.
- Охирги дақиқаларда рақиб посбони четлатилди ва унинг ўрнига футболчи дарвозани қўриқлай бошлади. Нега зарба бериш ўрнига пас берилди?
- Чунки у ердан гол уришнинг иложи йўқ. Бу кулгили бўларди. Қанотдаги футболчи очилиб, тўпни қабул қилиб, жарима майдончасига кириши ва дарвозабон билан бирга-бир чиқиши керак эди.
- Салбий янгиликлардан ташқари ижобий хабарлар ҳам бор. “Динамо”нинг икки футболчиси терма жамоа билан ЖЧ-2026га йўл олиши мумкин. Бу футболчиларга қўшимча мотивация берадими?
- Бу ҳар бир футболчининг орзуси. Ўтган йили терма жамоага номзодлар кўпроқ эди.
- Мавсумнинг биринчи қисми якунига етди. Режалар ҳақида айтиб бера оласизми?
- Футболчилар декабрдан бери маош олишмаяпти. Қандай режа ҳақида гапириш мумкин? 3 нафар хорижликлар кетишди. Бундай вазиятда режалар ҳақида гапириш қийин.
