- Ўйин ҳақида фикрингиз?
- Баҳсни кўпчилик кўрди, ўзимиз мағлуб бўлдик. Ўйин ҳақида бошқа гапирмоқчи эмасман. Яхшиси саволларга ўтайлик. Чунки ўз хатоларимиз туфайли гол ўтказиб, мағлубиятга учраяпмиз.
- Жамоангиз тўп киритгач, футболчилар ўйин вақтини чўза бошлади, натижада голлар қабул қилиб олинди.
- Ҳа айтиб ўтганимдек, негадир голдан кейин умуман ўйинимиз қовушмади, орқага ўтириб олдик, ишонч йўқолди, кейин голлар ўтказдик. Сиз ҳақсиз.
- Жамоа охирги 15 дақиқада ҳушёрликни умуман йўқотиб қўйди. Бунга нима сабаб бўлди?
- Балки жисмоний тарафдан тайёр бўлмадикми, тўпни дуч келган томонга тепиб юборавердик. "Андижон"нинг ўйин қолипига тушиб қолдик. Ўтказилган биринчи голда рақиб адашмасам биринчи марта зарба берди ва шу ҳам гол бўлди.
- Мағлубиятга майдон ҳолати таъсир қилмадими? Билишимизча, "Андижон"да пул бор ва яхши майдон қилса бўлади-ку?
- Ютқазгандан кейин исталган гапни гапириш мумкин. Лекин ҳозир буни айтишдан не фойда. Биз гол урганимизда майдон халақит бермади ва рақиб ҳам биз каби шу майдонда ўйнади. Ҳисоб 1:0дан кейин ўйнашда давом этишимиз керак эди. Вазиятлардан фойдаланиб яна гол уришимиз лозим эди. Энг ачинарлиси, "Андижон" бизни катта устунлик билан мағлуб этмади, шунда ўйинни атрофлича муҳокама қилаётган бўлардик. Биз ўзимиз ютқаздик.
- Анвар Ҳожимирзаевнинг ўзини тутиши ғалати туюлмадими? У жуда агрессив ўйин намойиш этди, ҳамма билан тортишиб юрди, натижада қизил карточка олди. Аввалги тур Салим Мустафоев ҳам "қизил" олганди.
- Ҳаммамиз кап-катта одамлармиз ва бир нарсани тўғри тушуниш керак, бир неча ойдан бериш маошсиз қолиш футболчиларни ҳам ёвуз қилиб қўяди. Ҳамма бир-бирига ёмон қарай бошлайди. Бу ерда кимнидир оқлаш учун бир нарса дейиш қийин. Бир футболчимиз кетиб қолди, иккинчиси кетиш тараддуида. Мен нима ҳам қила олардим.
- Хислат Халилов билан уругвайлик легионер бошқай ўйнамаскан деб эшитдик.
- Легионерлар бекорга келмаган, пул ишлаш учун келган. Текинга ким футбол ўйнайди? Унинг агенти бизга хат ёзди, пул қачон бўлишини сўради, биздан эса жавоб йўқ. Ўйиндан олдин майдонга тушмаслигини айтди ва кетиб қолди. Менимча, ФИФАга мурожаат қилса керак. Вазият нима бўлишини кутамиз. Хислат Халиловга келсак, у олдимга келиб кетмоқчи эканлигини айтди. Мен ҳеч кимни қолишга кўндирмоқчи эмасман. Охирги баҳсда унга нисбатан ҳайқириқлар бўлди, балки шунга кетмоқчидир. Жамоада ўзини эмас, бутун коллективни ўйлаш керак. Футболчи ўйнашни хоҳламаяпти, майли хоҳламасин.
