Испаниянинг нуфузли Diario AS нашри тарқатган хабарга кўра, 36 ёшли собиқ футболчи катталар футбол мақомидаги топ-клубларни бошқариш истагида жиддий эканини билдирган.
Маълумотларга кўра, таниқли собиқ ярим ҳимоячи Қироллик Испания футбол федерациясини (RFEF) ўз режаларидан расман хабардор қилган. Кроос кейинги мавсум бошланадиган собиқ профессионал ўйинчилар учун мўлжалланган махсус тезлаштирилган мураббийлик курсида ўқишни бошламоқчи.
Мазкур ўқув дастурини муваффақиятли тамомлаш немец мутахассисига “А” тоифали тренерлик лицензиясини қўлга киритиш имкониятини беради. Таъкидланишича, Кроос фақат болалар-ўсмирлар футболи ёки академиялар билан чекланиб қолмоқчи эмас, балки энг юқори даражадаги катталар жамоаларидан бирини бошқариб, тўлақонли дебют қилишни мақсад қилган.
Эслатиб ўтамиз, Тони Кроос 2024 йилнинг ёзида ўзининг футболчилик фаолиятига расман якун ясаганини эълон қилганди. Унинг сўнгги клубдаги ўйини “Реал” сафида Чемпионлар лигаси финалидаги ғалаба бўлган бўлса, шундан сўнг у Германия терма жамоасига ўз уйида ўтган Европа чемпионатида чорак финалга қадар етиб боришга ёрдам берганди.
