Биринчи турдаги кутилмаган натижалар ва сенсациялардан сўнг, иккинчи тур жамоалар учун ҳаёт-мамот масаласига айланмоқда. "Тезкор студия"нинг навбатдаги сонида таниқли футбол экспертлари Камолиддин Алимов, Нарзулла Сайдуллаев ҳамда Миркомил Мусаев гуруҳлардаги вазият, Испаниянинг юриши, Осиё грандларининг мақсадлари ва бўлажак Ўзбекистон — Португалия баҳси атрофидаги қизиқарли воқеаларга тўхталиб ўтишди.
Испаниянинг "ғазаби" ва Ямалнинг ўхшамаган рекорди
Нарзулла Сайдуллаев: "Қоғозда Испания терма жамоаси фаворит эканлиги барибир маълум эди. Илк турдаги омадсизликдан (дуранг) сўнг, уларнинг иккинчи ўйинда икки карра куч билан майдонга тушиши кутилаётган эди. Уларнинг рақиби Саудия Арабистони эса биринчи турда Уругвай билан дуранг ўйнаб, кичик сенсация қайд этганди. Бироқ, бу сафар майдонга жаҳл билан тушган Испания осон ғалабани қўлга киритди ва учрашув тақдирини биринчи бўлимнинг ўзидаёқ ҳал қилди. Натижада бош мураббий асосий футболчиларга дам бериш имкониятига эга бўлди.
Эътиборли жиҳати, ёш юлдуз Ламин Ямал илк бор асосий таркибда майдонга тушди. Қизиқ факт: Ямал гол урган бўлса-да, афсонавий Пеленинг рекордига яқинлаша олмади. Ямал Жаҳон чемпионатидаги голини 18 ёшида киритган бўлса, Пеле ўз вақтида 17 ёшида бунга эришган.
Тан олиш керак, Испанияда охирги пайтларда Рауль ёки Мориентес каби соф ҳужумчилар етишмаяпти. Микел Ойарсабаль биринчи ўйинда кўплаб вазиятлардан фойдалана олмаганди. Эслаб ўтиш жоиз, Висенте дель Боске ҳам 2010 йилги Жаҳон чемпионатида вақти-вақти билан соф ҳужумчисиз ўйнаган эди. Ҳозирда Испания 4 очко ва плюс 4 та тўплар нисбати билан гуруҳда қолиб кетмайдиган даражада яхши позицияда. Агар охирги турда Уругвайга ютқазиб, Кабо-Верде йирик ҳисобда ғалаба қозонсагина, тўплар нисбатига кўра пастки ўринга тушиб қолиши мумкин, холос".
"Осиёликлар учун минимум вазифа — гуруҳдан чиқиш"
Миркомил Мусаев: "Иккинчи турда жамоалар тўғри йўлни топиб олиш учун бор кучларини беришади, чунки биринчи тур кўпроқ рақибни ўрганиш ва мослашиш вақти ҳисобланади. Масалан, Австралия терма жамоасини олайлик. Улар 2011 ва 2015 йилларда (ўз уйидаги чемпионлик маҳаллари) даҳшатли таркибга эга эди ва ўша пайтдаги Колумбиядан ҳам кучлироқ кўринарди. Авлодлар алмашинувидан кейин улар яна ўзларини қайта кашф қилишмоқда. Тўғриси, биринчи турдан олдин уларга унчалик ишонмагандим, аммо улар ўз кучини кўрсатиб, Туркияни 2:0 ҳисобида мағлуб этишди.
Бугунги кунда Япония ва Жанубий Корея каби грандлар учун Жаҳон чемпионатида минимум вазифа гуруҳдан чиқиш ҳисобланади. Бизда эса (Ўзбекистонда) гуруҳ босқичидан ўтиш ҳалигача максимум натижа сифатида кўрилмоқда. Биз бундан буёғига Жаҳон чемпионатлари ва Олимпиадаларда мунтазам қатнашишни одат қилишимиз керак. Шундагина жамоамизда барқарорлик пайдо бўлади ва катта ғалабалар эшиги очилади.
Ҳозирги пайтда Португалия лагеридаги ички ва ташқи келишмовчиликлар бизнинг фойдамизга ишлашини тилаб қоламиз. Тўғри, уларнинг барча футболчилари топ-клубларда ўйнайдиган профессионаллар. Матбуотдаги суратлар ва Роналдунинг ўзини тутишига қараганда, жамоа ичида катта низо йўқдек ва улар бирдамликни кўрсатишмоқда. Менимча, бу ОАВ томонидан бўрттирилган кичик шов-шув, холос. Барибир ҳамма нарса майдонда ҳал бўлади".
Ноқулай об-ҳаво ва Португалия тайёргарлиги
Нарзулла Сайдуллаев: "Португалия терма жамоаси Ўзбекистон билан ўйиндан олдин очиқ ҳавода тўлиқ машғулот ўтказа олмади. Бунга ҳудудда бошланган кучли бўрон ҳақидаги огоҳлантиришлар сабаб бўлди. Улар шунчаки ёпиқ машғулот залида шуғулланиш билан чекланишди. Маҳаллий об-ҳаво ҳам айни дамда уларга ноқулайлик туғдирмоқда ва бу биз учун кичик устунлик бўлиши мумкин.
Энг муҳими эса бошқа нарса. Ижтимоий тармоқларда ва стадионда юртдошларимизнинг шижоатини кўриб қувонасан киши. Криштиану Роналдуни қанчалик яхши кўришмасин, унга бўлган меҳрларини четга суриб, Ўзбекистон терма жамоасини биринчи ўринга қўйган ва ўз ватанига мухлислик қилаётган барча юртдошларимизга раҳмат айтаман!"
Ҳомийларимиз: CAU, “InfinBank”, “AKFA”, “Ucell”, “TT LLC”, “Black Cofee”, “OfoTour”
