Ўтган йил финал босқич ўйинларига Тошкент мезбонлик қилганди, бу мавсум эса асосий баҳслар Қаршида ўтказилади.
Бунда жами 11та жамоа ғолиблик учун кураш олиб боради. Ўн иккинчи жамоа "Бунёдкор" U-19 эди, бироқ клубдаги молиявий муаммолар сабаб "Бунёдкор" U-19 мусобақанинг финал босқичига бора олммаслиги маълум бўлди.
Ғолиблар ва энг яхши иккинчи ўрин
Бу йил U-19 чемпионатининг биринчи босқичи жамоаларни учта минтақага бўлган ҳолда ўтказилди: Ғарб, Шарқ ва Марказ. Ҳар бир минтақада ўнтадан жами 30та жамоа баҳс олиб борди.
Мусобақа регламентига биноан ҳар бир минтақадан биринчи босқич ғолиби ҳамда ҳар учала минтақанинг битта энг яхши иккинчи ўрин эгаси U-19 чемпионати финал ўйинларига саралашсиз йўл олди.
Шундай қилиб Ғарбдан "Бухоро", Шарқдан ОКМК, Марказдан "Насаф" U-19 жамоалари ҳал қилувчи финал ўйинларига йўл олишди. Шарқ минтақаси вакили "Нефтчи" U-19 эса энг яхши иккинчи ўрин сифатида тўғридан тўғри чорак финалда ўйнайдиган бўлди.
Барча минтақалардан умумий ҳисобда 12та жамоа (ҳар бир минтақадан тўрттадан, 1-4 ўринлар) U-19 чемпионатининг якуний босқичига йўл олганини ҳисобга олсак, "Шўртан", "Машъал", "Қизилқум", "Республика ФА", "Локомотив", "Сўғдиёна" ва "Пахтакор" ёшлари ўз иштирокларини саралашдан бошлашади.
12 ноябрь куни кимлар ўйнайди?
Режага кўра, 12 ноябрь куни тўртта ўйин бўлиб ўтиши лозим эди, бироқ "Бунёдкор" U-19 мусобақага бора олмаслигини маълум қилгач, рақиби "Пахтакор" U-19га техник ғалаба ёзилди. Натижада "Пахтакор" чорак финалда ОКМКнинг рақибига айланди.
Шундай қилиб мусобақанинг биринчи куни учта учрашув ўтказилади:
11:00. "Локомотив" - "Қизилқум" (Қарши, "Геолог" стадиони)
17:00. "Шўртан" - "Республика ФА" (Ғузор, Марказий стадион)
17:00. "Сўғдиёна" - "Машъал" (Муборак, Б.Вафоев номли стадион)
Саралаш ўйинлари якунига кўра, "Локомотив" - "Қизилқум" жуфтлиги ғолиби чорак финалда "Насаф" U-19, "Шўртан" - "Республика ФА" жуфтлиги ғолиби "Нефтчи" U-19 ҳамда "Сўғдиёна" - "Машъал" ғолиби чорак финалда "Бухоро" U-19 билан ўйнайди. Чорак финал баҳслари 14 ноябрга белгиланган.
16 ноябрь куни мусобақанинг ярим финал учрашувлари ўтказилса, 18 ноябрда 3-ўрин учун баҳс билан ҳал қилувчи финал ўйини бўлиб ўтади. Шуни айтиш лозим, U-19 чемпионатининг финал баҳси Қаршидаги "Насаф" Марказий ўйингоҳида бўлиб ўтади.
Бош мураббийлар кимлар?
U-19 чемпионати энг қизиқ ўтадиган мусобақалардан бири бўлиб қолди. Ёшлар ўртасидаги ўйинларда ҳаяжон етарлича бўляпти, кутилмаган натижалар ҳам талайгина. Бу ёшлар эрта-индин Суперлига ва Пролига клубларида ўйнайдиган футболчилар ҳисобланади. Умуман олганда ПФЛ U-19 чемпионатини йўлга қўйиб жуда тўғри қилган.
Табиийки бу ёшдаги футболчиларни шуғуллантираётган мураббийларга ҳам қизиқиш ортади. Шу боис маълумот ўрнида U-19 чемпионатининг финал босқичида ўйнайдиган жамоалар мураббийларига тўхталиб ўтамиз.
ОКМК U-19 - Элёр Интизомов
"Насаф" U-19 - Сирожиддин Эшқобилов
"Бухоро" U-19 - Анвар Ражабов
"Нефтчи" U-19 - Ғайрат Ҳасанов
"Шўртан" U-19 - Эркин Мирзаев
"Машъал" U-19 - Дилшод Андаев
"Қизилқум" U-19 - Файзулла Қамбаров
"Республика ФА" - Айдер Курбаев
"Локомотив" U-19 - Марат Бикмаев
"Сўғдиёна" U-19 - Элбек Имомназаров
"Пахтакор" U-19 - Отабек Мансуров
Хайрулла Холиқов
