Камолиддин Алимов, Нодирхўжа Юлдашев, Толибжон Қосимов иштирок этган кўрсатув стартида Ўзбекистон терма жамоаси собиқ футболчиси, мухлислар ёқимтойи Александр Гейнрихнинг фикрлари билан бошланди.
“Барча мухлисларни Жаҳон чемпионати билан табриклайман. Бу биз учун тарихий мусобақадир, чунки илк бор бундай йирик турнирда иштирок этяпмиз. Ҳозир ичимда турлича ҳиссиётлар жўш урмоқда, тўғриси, мўъжиза кутяпман. Ўзбекистон ва футболимиз билан фахрланаман, ғурурланаман”,- дейди Гейнрих.
“Йигитларга омад тилайман. Муҳими, баҳсларга жароҳатларсиз етиб боришсин. Майдонда ўз футболингизни кўрсатинг, қўрқманг. Биз — миллионлаб мухлислар сиз биланмиз. Нафақат юртдошларимиз, балки бутун МДҲ ҳам Ўзбекистонга мухлислик қилади.
Ўйинлардаги сув ичиш учун тўхталишларга келсак, бу албатта учрашувнинг томошабоплигига салбий таъсир қиляпти, дея оламан”,- дея фикр билдирди собиқ тўптепар.
“Колумбия — жуда тажрибали ва курашувчан жамоа. Таркибида техник ва тезкор футболчилар йиғилган. Иккинчи томондан, Осиё жамоалари ҳам қандай ўйнаётганини кўриб турибмиз. Мен йигитларимизга ишонаман. Сизлар учун байроқларни баланд кўтарамиз. Тарғибот роликларидан ҳам кўриниб турибдики, бутун халқ сизга умид боғлаган. Омад ва зафарлар ёр бўлсин, олға, Ўзбекистон”,- дейди Александр Гейнрих.
Ҳомийларимиз: CAU, “InfinBank”, “AKFA”, “Ucell”, “TT LLC”, “Black Cofee”, “OfoTour”
