Вакилларимиз гуруҳ босқичидаги учинчи, ҳал қилувчи учрашувни Конго ДР терма жамоасига қарши ўтказади.
“Тезкор студия” кўрсатувининг навбатдаги сонида Португалия билан кечган оғир баҳс якунлари ва Конго ДР билан кутилаётган ўйин олдидан кенг қамровли таҳлил тақдим этилди. Кўрсатувда меҳмон сифатида собиқ футболчи Санъат Шихов иштирок этди. Шунингдек, таниқли спорт журналистлари Нодирхўжа Юлдашев, Нарзулла Сайдуллаев ва Толибжон Қосимов ўз фикр-мулоҳазалари билан ўртоқлашдилар.
Санъат Шихов: “Португалия бор карталарини Ўзбекистон билан ўйинда очиб ташлади”
Собиқ футболчи Санъат Шиховнинг фикрича, Португалия билан баҳсда футболчиларимизда руҳий ва жисмоний жиҳатдан тайёргарлик етишмагани сезилиб қолган:
"Йигитларда ҳаяжон кучли бўлди, устига-устак Португалия жуда жиддий рақиб. Футболчиларимиз бу ўйинга ҳам руҳан, ҳам жисмонан тўлиқ тайёр бўла олишмади деб ўйлайман. Тайёргарлик етарли эмаслиги майдонда кўриниб турди. Португалия гўёки финалгача бўлган барча карталарини айнан Ўзбекистон билан ўйинда очиб ташлагандек таассурот қолдирди".
Шихов, шунингдек, рақибнинг кучли ва заиф томонларини алоҳида қайд этди:
"Португалиянинг энг кучли чизиғи — ўрта ярим ҳимояси. Лекин айнан шу чизиқда бўшлиқлар бор эди. Витинья бошқа иш билан шуғулланди, Бруну Фернандеш эса фақат Роналдуни қидириб ўйнади. Энг аламлиси, айнан ўша паллада биз рақибга босим қила олмадик. Конго ДР буни жуда яхши уддалаган эди, Колумбия ҳам уларнинг айнан шу заиф тарафидан фойдаланади.
Португалиянинг орқада бўш ҳудуд қолдирадиган одати бор. Нуну Мендеш орқага қайтмайди, Жоау Канселу эса фақат олдинда ўйнайди. Биз уларнинг ўйинига мослашиб қолдик, руҳий босимдан чиқа олмадик. Мундиалдаги босим умуман бошқача бўларкан".
Нарзулла Сайдуллаев: “Роналдунинг интеллекти даҳшатли даражада юқори”
Журналист Нарзулла Сайдуллаев рақиб таркибидаги юлдузларнинг индивидуал маҳоратига тўхталди:
"Бруну Фернандеш биз билан ўйинда жуда бемалол ҳаракат қилди. Криштиану Роналду эса майдонда сониялар ичида қарор чиқаряпти. Унинг футбол интеллекти даҳшатли даражада юқори эканлиги яққол кўринди".
Бу фикрни Санъат Шихов ҳам қўллаб-қувватлади:
"Ўйиндан олдин Роналду атрофида ОАВда босим кўпайганди. Лекин у ҳақиқий ҳужумчи қандай ўйнаши кераклигини кўрсатиб берди. Рақиб унга озгина имкон берса, жазолайди. Йигитларни танқид қилиш ниятим йўқ, қўлимиздан келганича ҳаракат қилдик.
“Агар бўлажак рақибимиз Конго ДР ҳақида гапирадиган бўлсам, қуръадан олдин уларни ўрганганимда анча кучли жамоа эканлигига гувоҳ бўлгандим. Африка Миллатлар Кубогида ҳам узоққа боришган. Уларнинг футболчилари жуда тезкор. Конго билан ўйин жуда қийин бўлади".
Нодирхўжа Юлдашев: “Дарвозадаги кутилмаган ўзгариш ва тушунарсиз тактик тажрибалар...”
Журналист ва эксперт Нодирхўжа Юлдашев терма жамоани ЖЧга олиб чиққан футболчиларга миннатдорчилик билдирган ҳолда, мураббийлар штабининг қарорлари ҳақида гапирди. Айниқса, дарвозабон алмашинуви ва кечиққан захиралар эътирозларга сабаб бўлди:
"Футболчиларга раҳмат айтамиз, улар бизга Жаҳон чемпионати байрамини тақдим этишди. Лекин ташкилий ишлар ва тактик қарорларда саволлар кўп. Масалан, Колумбияга қарши ўйиннинг иккинчи бўлимида кўрсатган ўйинимиздан сўнг, Португалияга қарши таркиб нега бундай танлангани тушунарсиз.
Ўткир Юсупов ўйиндан бир кун олдин ҳамма билан машғулотларда қатнашган, лекин унга захирада қолиши ҳақида айтишмаган. Бу Абдувоҳид Неъматов учун ҳам кутилмаган совға (сюрприз) бўлди. Футболчи бундай баҳсларга руҳан тайёрланиши керак. Бу ҳолат менга 2011 йилги Осиё Кубогида Австралияга қарши (0:6) кечган ярим финални эслатиб юборди. Ўшанда ҳам Игнатий Нестеров ўйинга оз қолганда ўйнай олмаслигини айтган ва Темур Жўраев олов ичида қолиб кетган эди".
Юлдашев, шунингдек, Достон Ҳамдамовнинг захирада қолдирилиши ва тактик ўзгаришларга ҳам тўхталди:
Достон Ҳамдамов нима учун ўйнамагани ҳам тушунарсиз. Ўйин тугашига оз қолганда, 90-дақиқада, ҳисоб 0:3 бўлиб турган пайтда захирадан футболчи тушириляпти. Аслида 60-дақиқалардаёқ ўзгаришлар қилиб, ўйинни янгилаганимизда, гол урмасак ҳам ўз дарвозамиздан тўп ўтказиб юбормаслигимиз мумкин эди. Бу тўплар нисбати учун жуда муҳим эди. Хожиакбар Алижонов иккинчи бўлимда чап қанотда ўйнади. Беҳруз Каримовда кичик жароҳат бор эди, аслида уни ўнгда туширса ҳам бўларди. Алижонов ёмон футболчи эмас, лекин бирданига Португалиядек рақибга қарши умуман бошқа чизиқда ўйнаш... Жаҳон чемпионати тажриба орттирадиган ёки синов ўтказадиган мусобақа эмас шекилли?
Алижонов чапда ўйнаганида ҳам яхши рейдлар уюштирди, лекин у ўнгда ўйнагани маъқул эди. Нидерландия билан ёмон ўйнамаган Фарруҳ Сайфиевни туширса бўларди.
Умумий ўйинни олсак, йигитлар тайёр эмаслиги кўринди ва ютқаздик. Албатта, натижа бошқача бўлганида, мураббийнинг бу қарорлари тўғридек кўринган бўларди. Майдонда ҳисоб 0:4 бўлиб кетган тақдирда ҳам йигитлар югуришди, ҳаракат қилишди. Шунчаки ўйин ўхшамади ва биз Португалия чизиб берган сценарийга тушиб қолдик. Масалан, Канселу бемалол марказда алдаб юрибди — катта жамоалар бундай хатоларни кечирмайди".
Ҳомийларимиз: CAU, “InfinBank”, “AKFA”, “Ucell”, “TT LLC”, “Black Cofee”, “OfoTour”
