Ташкилотнинг собиқ раҳбари Йозеф Блаттер ана шундай фикр билдирди. Унинг сўзларини “Der Spiegel” журналига таяниб AFP агентлиги келтирмоқда.
Инфантино 2016 йил февраль ойида бўлиб ўтган навбатдан ташқари конгрессда ФИФА раҳбари этиб сайланган эди. Кейинчалик у икки марта муқобил номзодларсиз қайта сайланди. Ташкилот раҳбарлиги учун навбатдаги сайловлар 2027 йил март ойида Марокашда бўлиб ўтади.
“У — диктатор. ФИФАдагиларнинг менга айтишича, у билан битта лифтдан фойдаланишга ҳеч кимга рухсат берилмайди. У дахлсиз шахсга айланган”, — деди Блаттер.
“Инфантино энди ҳеч қандай чегарани билмайди. У реаллик билан алоқани бутунлай йўқотган. Эҳтимол, Инфантинони руҳий касалликлар шифохонасига юбориш керакдир”, — дея қўшимча қилди собиқ президент.
Эслатиб ўтамиз, июль ойида Инфантино ташкилотнинг асосий эркаклар ва аёллар мусобақаларини назорат қилувчи компания тузмоқчи бўлгани маълум бўлган эди. Унинг фикрича, “FIFA Forward Enterprise” компаниясининг ташкил этилиши ФИФАга аъзо ассоциациялар даромадини ошириши ва бутун дунёда футбол ривожига ҳисса қўшиши керак эди. Халқаро футбол федерацияси ушбу схема 4,2 миллиард доллар жалб қилиши мумкинлигини маълум қилганди. Бироқ мазкур ташаббус функционерлар, федерациялар ва бошқа ташкилотлар томонидан оммавий танқид ва қоралашга учради.
Хусусан, Инфантинонинг таклифини Европа футбол ассоциациялари иттифоқи (УЕФА), Шимолий, Марказий Америка ва Кариб ҳавзаси футбол конфедерацияси (КОНКАКАФ), Осиё футбол конфедерацияси (ОФК) ҳамда Жанубий Америка футбол конфедерацияси (КОНМЕБОЛ) рад этди. Кейинчалик Африка футбол конфедерацияси, Аргентина футбол ассоциацияси ва яна бир қатор миллий федерациялар Инфантинони қўллаб-қувватлади. 23 октябрь куни ОФК президенти шайх Салмон бин Иброҳим ал-Халифа ташкилот ФИФА раҳбарлиги учун бўлажак сайловларда Инфантино номзодини қўллаб-қувватлашини маълум қилди.
