Фожиа 4 август куни Наратхиват вилоятининг Сунгайколок шаҳрида содир бўлди. Ўйин вақтида кучли ёмғир ва шамол билан момақалдироқ бошланган, шундан сўнг чақмоқ футбол майдони ҳудудига урган.
Турнирда "Абу х Нонг Сирин" жамоаси сафида тўп сурган Аваэ оғир тан жароҳатларини олди. Шифокорлар футболчини қутқаришга ҳаракат қилишди, бироқ кейинчалик у вафот этди.
Маҳаллий ОАВ хабарларига кўра, чақмоқ уриши оқибатида яна бир неча киши жабрланган. Турли манбалар 8–10 нафар жабрланувчи ҳақида хабар бермоқда. Саккиз нафар футболчи шифохонага ётқизилган, Малайзиядан келган бир футболчи даволанишни ўз ватанида давом эттиришга қарор қилган, яна икки киши текширувдан ўтмоқда.
Аваэ аввалроқ "Паттани" жамоасида ўйнаган ва фожиадан сал олдин "Яла" клуби билан шартнома имзолаган эди. Жамоа футболчининг оила аъзоларига ҳамдардлик билдирди, мухлислар ва тайландлик футбол вакиллари ижтимоий тармоқларда унинг хотирасини ёдга олишди.
Golok FA Cup — Таиланднинг жанубий вилоятлари жамоалари, шунингдек, қўшни Малайзия клублари иштирок этадиган минтақавий турнир ҳисобланади.
