Учрашувдан кейин "Реал" бош мураббийи Жозе Моуринью hакам Ортис Арьяснинг "Атлетико" футболчилари Ли Кан Ин ва Кристиан Ромерога қизил карточка кўрсатмаганидан норозилик билдирган. Кейинроқ AS нашри лиганинг Ҳакамлар техник қўмитаси Ли Кан Ин майдондан четлатилиши керак бўлган деган хулосага келганини хабар қилди. Душанба куни эса Тебас "Реал" ҳамда Real Madrid TV телеканалини танқид қилиб, уларни ҳакамларга босим ўтказишда айблади.
"Ла Лига президенти ўз хизмат мавқесидан фойдаланган ҳолда ҳар бир оммавий чиқишида "Реал"ни обрўсизлантириш ва унга ҳужум қилишни давом эттиришини мутлақо йўл қўйиб бўлмайдиган ҳолат деб ҳисоблайди. Ла Лиганинг барча клублари манфаатларини ҳимоя қилиш учун масъул бўлган шахснинг шунчалик тазйиқ билан фақат "Реал"га эътибор қаратиши ва клубимизни доимий ҳужум нишонига айлантириши жиддий ташвиш уйғотади. Унинг сўнгги баёнотлари раҳбарга хос бўлмаган тарзда ўта жиддий ва тушунарсиздир, чунки улар рақамли нашрдаги мустақил журналист мақоласига асосланган. Бироқ у ҳатто бизнинг стратегиямизни баҳолашгача бориб етдики, бу батамом ноўрин ва масъулиятсизликдир", — дейилади "Реал" баёнотида.
"Бундай номуносиб ва тизимли хулқ-атворни ҳисобга олган ҳолда, биз Испания профессионал футбол чемпионатига уни бошқара оладиган ҳамда бетарафлик тамойилига тўлиқ амал қилган ҳолда унинг салоҳиятини юзага чиқара оладиган янги раҳбар керак деб ҳисоблаймиз. Ла Лига президенти чемпионат эгаси эмас, балки унга кирувчи ва бошқарувни ишонган клубларга хизмат қилувчи менежер эканини тушунадиган шахс зарур. Клубларга айнан шу вазифани ҳалол бажара оладиган инсон керак", — дея қўшимча қилинади Мадрид клуби баёнотида.
Тебас 64 ёшда бўлиб, у 2013 йилдан буён Ла Лигани бошқариб келмоқда. Аввалроқ функционер бир неча бор "Реал" мухлиси эканини маълум қилганди.
