Унда "Пахтакор Фарм" жамоаси "Яйпан"ни қабул қилди. Ўйиндан сўнг ташкил этилган матбуот анжуманида фарғоналиклар устози Рашиджон Ғофуров иштирок этди.
— Ўйин ҳақидаги фикрларингиз?
— Раҳмат. Авваламбор ўйин ҳақида гапирадиган бўлсам, кўрдингиз, жуда чиройли ва қизиқарли баҳс бўлди. Биз осон ўйин бўлмаслигини олдиндан билардик. Чунки рақиб бизнинг ўйин услубимизни ўрганган, биз ҳам уларнинг ҳаракатларини таҳлил қилгандик. Шундан келиб чиқиб, "Пахтакор Фарм" кўпроқ иккинчи рақам остида ўйнашга ва қарши ҳужумлардан фойдаланишга ҳаракат қилди.
Шунга қарамай, бемалол айта оламанки, биз майдонда доминантлик қилиб, ўйин тизгинини қўлга олишга уриндик. Йигитларга тўғри ўйнашни, ортиқча шошилмасликни тушунтиргандим. Агар футболчилар шошмасдан, кўрсатмаларни охиригача тўғри бажаришса, рақиб мудофаасидан барибир бўшлиқ топилишини ва гол уришимизни айтган эдим. Якунда, ўйин охирлаб қолган бўлса-да, барибир ўз мақсадимизга эришдик.
