Роналду миллий жамоа қароргоҳини тарк этганидан сўнг, мамлакатда бу воқеа асосий муҳокама мавзусига айланди.
Федерация футболчи билан муносабатлар бундай кескин ва нохуш тарзда якунланишини истамаяпти. Раҳбарият Роналдунинг розилиги билан келаси ҳафта томонларни, жумладан, бош мураббий Жорже Жезушни ҳам яқинлаштиришга ҳаракат қилади.
Федерация вазиятни тинч йўл билан ҳал қилиш ва Роналдунинг Португалия терма жамоасидаги фаолияти сўнгги воқеалар билан якунланмаслигига умид қилмоқда. Улар Криштиануга терма жамоадаги фаолиятини ҳурмат ва муносиб тарзда якунлаш имкони берилиши керак, деб ҳисоблайди.
Аввалроқ федерация Роналду жамоа қароргоҳини тарк этганидан сўнг баёнот бериб, эътиборни спорт натижаларига қаратганди: "Бутун делегация терма жамоанинг яқиндаги учрашувлари ва белгиланган мақсадларга эришишга тўлиқ эътибор қаратмоқда".
Роналду эса ижтимоий тармоқларда вазиятга муносабат билдириб, вақти келганда терма жамоани тарк этишига сабаб бўлган воқеалар ҳақида барча португалияликларга ҳақиқатни айтишини билдирди.
"Мен ҳар доим ўзимни бағишлаб келган Португалия терма жамоасини нима сабабдан тарк этганим ҳақида вақти келганда барча португалияликларга ҳақиқатни айтаман. Ҳозир эса Португалия ва барча жамоадошларимга омад тилайман", — деб ёзди Роналду.
Шу орада Лиссабоннинг бир нечта жойида, жумладан "Эштадиу да Луш" стадионидан аэропортга олиб борувчи йўлда Роналдуни қўллаб-қувватловчи баннерлар пайдо бўлди. Уларда футболчи мақталган ва Жорже Жезушнинг ҳаракатлари танқид қилинган.
Роналду Данияга қарши Миллатлар лигаси ўйини олдидан Жезуш билан юзага келган зиддият сабаб терма жамоа қароргоҳини тарк этгани хабар қилинган. Кейинчалик унинг Португалия терма жамоасидаги фаолиятини якунлагани ҳақида хабарлар тарқалди.
Роналду Португалия терма жамоаси ва халқаро футбол тарихидаги энг яхши тўпурар ҳисобланади.
