Роналду ЖЧ-2026 стартувчи баҳсида ДР Конго билан дурангдан (1:1) сўнг кескин танқидларга учраган эди.
"Португалия ўйинидан бир кун олдин Лионель Мессининг хет-трик қилгани Криштиану Роналдуга ортиқча босим ўтказди. Аммо мен унинг шаънига айтилаётган танқидларни қабул қилмайман.
Португалия ДР Конгога қарши учрашувда у қадар яхши ўйин кўрсатмади ва баҳсдан сўнг барча айбни Роналдуга ағдариб, уни жамоа учун муаммога айлангани ҳақида гапира бошлашди.
Бироқ у маълум маънода доим шундай ўйнамаганми? У, айниқса сўнгги йилларда, ўйин давомида доимо кўриниб турадиган футболчи бўлмаган. Бунинг эвазига у катта ўйинларда, ҳал қилувчи вазиятларда ўзини кўрсатади. Агар у гол урмаса, ҳамма айбни Роналдуга ағдариш жуда осон. Криш 41 ёшида, табиийки, шубҳалар остида қолади.
Аммо шундай гап-сўзлардан кейин у кейинги ўйиндаёқ ҳаммани жим бўлишга мажбур қилган вазиятлар неча бор кузатилган? Агар сиз Роналдуни майдонга тушираётган экансиз, унинг нима учун у ердалигини тушунишингиз керак. Ва агар у Ўзбекистонга қарши учрашувда ўз хет-трики билан жавоб қайтарса, мен бундан асло ҳайратланмайман", — деди Оуэн Daily Mail нашрига берган интервьюсида.
Эслатиб ўтамиз, Португалия — Ўзбекистон учрашуви 23 июнь куни бўлиб ўтади.
