– Ўйин ҳақидаги фикр-мулоҳазаларингиз билан ўртоқлашсангиз.
– Узоқ кутилган миллий чемпионатимизга ҳам қайтдик. Ўйинга келадиган бўлсак, ҳақиқатан ҳам қизиқарли баҳс кутаётган эдик. Бунинг сабаблари кўп: икки ойдан ортиқ вақт давомида ўйин амалиёти йўқ эди, қолаверса, чилла пайти бўлгани учун об-ҳаво масаласидан бироз хавотирланаётган эдим. Лекин иккала жамоа ҳам бир-бирига муносиб эканлигини кўрсатди. "Навбаҳор" ҳам яхши шаклланган жамоа. Йигитларга ўйиндан олдин бу иссиқ ҳавони ҳисобга олган ҳолда, албатта, кўпроқ тўпни назорат қилиш кераклигини таъкидлаган эдим.
Биринчи бўлимда кўпроқ "Навбаҳор" жамоаси ташаббусга эга бўлди. Биз эса тезкор ўтказиб юборилган голдан сўнг (бу кутилмаган эди, яқин бурчакка чиройли тарзда йўлланди) ўйинни яна ўз қўлимизга олдик.
Шунга қарамасдан, йигитларимиз қўл қовуштириб ўтирмади, иссиқ ҳавога қарамай охиригача курашди. Бу руҳиятга таъсир қиладиган жиҳат: ҳаракат қилсанг-у, вазиятлардан унумли фойдалана олмасанг, иссиқ ҳам асабга тегади. Лекин йигитларга қойил қолиш керак, охиригача курашиб, якунда ғалабани илиб кетдик. Чиройли ўйин бўлди, деб ўйлайман. Албатта, буни кўриб чиқиш керак, ўзига яраша хатоларимиз ҳам бор. Кейинги ўйинга тайёргарлик кўрамиз ва "Навбаҳор" жамоасига келгуси баҳсларда омад тилаб қоламан.
– Ғалаба билан табриклайман. Жамоангизнинг Тожикистондаги йиғинларини ҳам кузатиб бордим, ўртоқлик учрашувлари ўтказилди. Биринчи бўлимдан кейинги ҳолат "Иван Васильевич" киносидаги Буншанинг тахтга ўтириши ва кейинчалик "Царь-то ненастоящий!" дейишини эслатиб юборди. Аммо якунда жамоа ирода кўрсатди. Умуман олганда, саволим шундан иборат: йиғинлар ва тайёргарлик қай даражада ўтди, деб ўйлайсиз? Чунки "ОКМК" трансферлар борасида унчалик фаол бўлмади.
– Энди, четдан қараганда "Иван Васильевич касбини ўзгартиради" фильмидек туюлиши мумкиндир. Сизлар учун бу балки кинодир, бироқ биз учун бу ўзига яраша машаққатли иш. Юқоридан қараганда осон туюлиши мумкин. (Залдагиларга қарата) Бу ерда кондиционер борми? Салқинми, йўқми? Футболчилар – иссиқ жон, улар тинимсиз югуради. Бу иссиқ ҳаво уларнинг танасидан қандай ўтишини ўзлари яхши билади, бу табиий ҳолат. Лекин улар берилган машғулот юкламаларини тўғри қабул қилишга ва яхши ишлашга интилишди. Мана шундай ҳавода ўзини қандай тутиш кераклигини билиш муҳим. Бу биз учун кино эмас, реал ҳолат. Охирида очиқ футбол бошланди, у ёқдан-бу ёққа югуриш, тўғриси, осон эмас.
– Янги олинган футболчингиз Пешич захирадан тушиб, иккита ассист қайд этди. Унинг қанчалик мослашиб кетишини ҳали вақт кўрсатади, лекин ёшига қарасак, 34 ёшда экан. "ОКМК"нинг сўнгги пайтлардаги сиёсати таркибни ёшартиришга қаратилган эди. Ушбу трансфер ҳақида ҳам фикр билдирсангиз.
– Албатта, бу малакали футболчини трансфер ойнасининг охирги куни таклиф қилдик. Сабаби, Ноя бизга ёрдам бермайди. Ҳамма яхши – ухлаганда, дейман. Ҳаммасини вақт кўрсатади. Лекин биз бу футболчимизни чап қанотда ҳам, ўнг қанотда ҳам, марказда ҳам бемалол ўйнай оладиган, 3-4 та позицияни ёпиб бера оладиган ўйинчи бўлгани учун таклиф қилдик. Ундан керагича фойдаланишни вақт кўрсатади.
– Нега бу саволни беряпман, сабаби "ОКМК"нинг охирги йиллардаги трансфер сиёсатига қарасак, масалан, Даци, Рухадзе ёки Риак каби легионерлар кутилганидек муваффақиятли ўйнамагани учун селекция борасида саволлар туғиляптими?
– Бизда битта жойимиз бўшади ва биз шуни қисқа вақт ичида тўлдирдик. Жамоада бўлган ҳар бир ўйинчи – маҳаллий бўладими, чет эллик бўладими – биринчи навбатда жамоа манфаати учун ҳаракат қилиши керак. Мен иродасиз майдонда шунчаки вақт ўтказиб юрадиган одамни ёмон кўраман. Келиб қўшилдими, жамоага ёрдам бериши керак. Шунинг учун ҳам Ноя билан хайрлашдик. У бизга ёрдам бера олмади. Уларга вақт, имконият ва шароит берилди, лекин ҳеч қандай ижобий ўзгариш бўлмади. Пешичнинг эса фойдаси тегади, деб умид қиламан.
– Сиз билан ўтган матбуот анжуманида гаплашганимизда "ёш футболчиларимиз бор, улар ўзини кўрсатсин, Жаҳон чемпионатига бориши керак" деган эдингиз. Мана, бугунги таркибда ҳам ёшлар тушяпти. Умуман олганда, мана шу катта паузадан кейин кўп хато ва камчиликлар кузатилди. Бугун ҳисоб 6:6 кўринишида ҳам қайд этилиши мумкин эди. Позицион ва индивидуал хатолар жуда кўп бўлди. Паузадан кейинги эҳтиёткор футболни кўрмадик, аксинча, очиқ ва ҳужумкор футбол гувоҳи бўлдик. Бунга Жаҳон чемпионатининг таъсири қандай? Яъни, Жаҳон чемпионатидаги камбэкларни (масалан, Англия ёки Аргентина иштирокидаги учрашувлардаги каби) бизнинг футболга таъсири борми?
– Қаранг, руҳият ҳақида гапирдик-ку. Шу етишмайди. Яхши ёшлар бор, лекин улар бошқа жамоаларда ўйнаяпти, уларнинг агентлари бошқа жамоалар билан ҳам алоқада бўлади. Мен ўтган йили ёзда академия очилганда ҳам айтгандим: бунга вақт керак. Дарахт экканингиздан кейин мевасини дарров бермайди-ку. Бу ишлар яхши ниятда қилинди.
Ўлмасалиев мундиални ўз кўзи билан кўрди. Аввал ҳам йигитларга кўп айтардим, энг юқори чўққи – Жаҳон чемпионати. Чемпионатимиз ҳам, бошқа мусобақалар ҳам ўша йўл сари элтади. Нодир ва Азизни ҳам терма жамоа билан мундиалга боришини истагандим, сабаби ўша пайтда Сергеевда жароҳат бор эди, бошқа ҳужумчиларнинг ҳолати юқори эмасди, фақатгина Шомуродов юқори даражада эди. Шомуродов бўлган тақдирдаям, 10-15 дақиқа имкон берилиши мумкин эди.
Ҳалиям айтаман, ҳадемай 4 йил ўтиб кетади, кейинги мундиал учун ҳаракат қилинглар. Ундан ташқари, Осиё кубоги бор. Улар интилиши керак. Кўпгина ёшларнинг энг юқори мақсади – автомобиль харид қилиш. Шу билан ўсишдан тўхтайди.
– Жаҳон чемпионати ҳақида саволим бор эди. Ҳар бир терма жамоа иштирокидаги ўйинлари давомида VIP ложаларда ўша мамлакат футболи афсоналарини кўрдик. Халқимиз сизни ўзбек футболининг афсонаси деб билади. Сизга бу борада Ўзбекистон футбол ассоциациясидан таклиф бўлмадими? Таклиф бўлмаган тақдирда ҳам ўз ихтиёрингиз билан бориш истаги йўқмиди?
– Қуръа ташлаш маросимига бориб келдим. Лекин бу ерда тушунарли сабаблар бор: ўз жамоамни ташлаб кетолмайман. Бу – иш. Вазият ишга таъсир қилмаслиги керак. Боришни хоҳлагандим, лекин иш туфайли бора олмадим.
