Шацких "Украинский футбол" нашрига берган интервьюсида рекордни бой берганидан афсусланмаётганини таъкидлади.
"Йўқ, албатта, ҳеч қандай ҳасад йўқ! Бу – тарих. Ҳозир бу ҳақда бир-икки кун гапиришади, кейин эса унутишади. Фақат кимдир ушбу натижага яқинлашганида яна эслашади.
Бу ҳақда юзлаб марта айтганман: мен учун рекордлар энг муҳими эмас. Мухлисларнинг эътирофи ва трибуналар мени қандай ҳаяжон билан кузатиб қўйгани анча муҳимроқ.
Одамларнинг эътирофи мен учун қуруқ рақамлардан беқиёс даражада қадрлироқ. Албатта, номинг футбол статистикасида бир умрга қолиши ёқимли. Аммо такрорлайман, булар иккинчи даражали нарсалар", – деди Шацких.
Шунингдек, собиқ футболчи Ярмоленко рекорд ўрнатган учрашувни томоша қила олмаганини, бироқ уни янги натижа билан табриклаганини билдирди.
"Афсуски, ўйинни кўра олмадим, чунки ўша вақтда жамоамизнинг ҳам учрашуви бор эди. Таассуротларимга келсак, нима ҳам дейишим мумкин? Андрейни ҳали қишда Туркиядаги йиғин пайтида табриклагандим. Унинг имкониятларига шубҳа қилмагандим.
Ҳозир яна бир бор табриклайман. Унинг бундай натижага эришганидан чин дилдан хурсандман. Ростини айтсам, бутун қалбим билан қувондим. Баракалла! Унга фақат шу руҳда давом этишини тилайман", – деди мутахассис.
Маълумот учун, Украина чемпионатининг 11-туридан ўрин олган "Динамо" ва "Кривбасс" ўртасидаги учрашувда (2:0) Андрей Ярмоленко 43-дақиқада пенальтидан гол урди.
Бу 37 ёшли футболчининг Украина Премьер-лигасидаги 125-голи бўлди. Шу тариқа, у 124 та гол билан ўн йилдан ортиқ вақт давомида рекордчи бўлиб келган Максим Шацкихнинг натижасини янгилади.
Эслатиб ўтамиз, Шацких 2025 йил ноябрь ойидан буён Қирғизистоннинг "Азия Талас" клубида бош мураббий сифатида фаолият юритмоқда.
