Шацкихнинг айтишича, иш жадвали сабабли у Колумбияга қарши ўйиннинг фақат иккинчи бўлимини томоша қилган.
— Мамлакатда тарихий воқеа — илк Жаҳон чемпионати қандай қарши олинмоқда?
— Бу ҳақиқатан ҳам тарихий воқеа. Ўзбекистон биринчи марта Жаҳон чемпионатига чиқди, буни ҳамма узоқ кутди.
Иккинчи бўлимда йигитлар ёмон ўйнашмади, ҳаракат қилишди. Қўлларидан келганини қилишди. Яхши ёки ёмон ўйнагани бошқа масала. Биринчи марта шундай муҳитга тушганлари учун ҳаяжон сезилиб турди.
Энг муҳими — жамоа тарихий биринчи голини урди. Кейин эса иккита жуда омадсиз гол ўтказиб юборди: биринчиси қўпол хато эвазига, иккинчиси эса тушунарсиз вазиятда тўп дарвозага кириб кетди. Умуман олганда, иккинчи таймда маълум имкониятлар яратилди, ахир рақиб Колумбия эди. Колумбияликлар қаерда ўйнайди, бизнинг футболчилар қаерда ўйнайди — шунга ҳам қараш керак. Ростини айтсам, жамоа муносиб ўйин кўрсатди.
— Умуман олганда, Ўзбекистондан бу Жаҳон чемпионатида нимани кутяпсиз?
— Плей-оффга чиқишини кутяпман. Масалан, ҳамма Португалия Конго ДРни осон ютади деган эди, мен эса бу осон бўлмайди деб айтгандим. Демак, ҳам португаллар билан, ҳам конголиклар билан ўйнаш мумкин. Бу — футбол.
Ҳар бир Жаҳон чемпионати ва Европа чемпионатида бўлгани каби, бу сафар ҳам кутилмаган натижалар бўлмоқда. Шунинг учун нега Ўзбекистон ҳам сюрприз қилмаслиги керак? Кўрамиз.
— Жаҳон чемпионати ва унинг ташкил этилиши ҳақида қандай фикрдасиз? Ўйинларни кузатяпсизми?
— Мен атиги учта ўйин кўрдим. Ҳозир Қирғизистондаман ва вақт жиҳатидан ҳаммасини кўриш қийин. Ҳозир Чехия — ЖАР учрашувини кўряпман. Шунингдек, Испания ва Франция ўйинларини томоша қилдим. Қолган ўйинлар тунги 2, 4, 5, 6 ёки 8 да бошланади. Менинг ҳам ўз ишим бор, тайёргарлик кўришим керак. Шунинг учун кўп ўйин кўра олмаяпман.
Ташкилотчиликка келсак, кўплаб шикоятларни эшитдим, лекин бу ҳақда гапиришни истамайман. Қолган жиҳатлари эса менга ёқмоқда. Майдонлар сифати, мухлислар, стадионлар — мен кўраётган нарсаларнинг барчаси юқори даражада ташкил этилган, — деди Шацких.
