Бу ҳақда Eurasia Football нашри ўз манбаларига таяниб хабар берди.
Манба маълумотларига кўра, 48 ёшли мутахассис 2027 йилда Украина грандини бошқариши мумкин. Ҳозирда Киев клубига Игорь Костюк устозлик қилмоқда.
Айни пайтда Шацких Қирғизистонда фаолият олиб бормоқда. У Таласнинг "Азия" клубини бошқаряпти. Олий дивизиондаги дебютант жамоа чемпионлик учун кураш олиб бормоқда: 25 та учрашувдан сўнг 49 очко жамғарган "Азия" турнир жадвалида учинчи ўринда бормоқда. Жамоа пешқадам "Барс"дан атиги уч очко ортда қолмоқда.
Шацких "Азия" бошқарувини 2026 йилги мавсум олдидан қабул қилиб олган. Ўтган йилнинг охирида ташкил этилган клуб учун жорий чемпионат элита дивизионидаги илк мавсум ҳисобланади.
Шацких учун "Динамо" бегона клуб эмас
Максим Шацкихнинг футболчилик фаолиятининг катта қисми айнан Киевнинг "Динамо" клуби билан боғлиқ. Ўзбекистон терма жамоасининг собиқ ҳужумчиси Украина жамоаси сафида 1999 йилдан 2009 йилгача тўп сурган.
Ушбу даврда Шацких бир неча бор Украина чемпионига айланган ва узоқ йиллар давомида жамоанинг етакчи ҳужумчиларидан бири бўлган. Футболчилик фаолиятини якунлаганидан кейин ҳам у "Динамо" тизимида қолиб, мураббий сифатида ишлаган.
Қирғизистонга кўчиб ўтишидан аввал Шацких Ўзбекистонда ҳам мураббийлик фаолияти билан шуғулланган. У Тошкентнинг "Пахтакор" ва "Андижон" клубларини бошқарган. "Пахтакор" билан эса Ўзбекистон чемпионлигига эришган.
Шацкихнинг Киев клуби билан узоқ йиллик алоқалари ва мураббийлик тажрибаси уни "Динамо" учун эҳтимолий номзодлардан бирига айлантирмоқда. Бироқ ҳозирча унинг тайинланиши бўйича расмий қарор эълон қилинмаган.
