12 ноябрь куни Талас клуби Шацких ва унинг мураббийлар штаби билан ҳамкорлик якунланганини эълон қилди.
“Украинский футбол” нашрига берган интервьюсида мутахассис бу қарор ўзи учун кутилмаган бўлмаганини таъкидлади.
“Бундай вазиятга тайёр эдим. “Азия”да бироз қайта қуриш ишлари амалга оширилади, клуб бошқа йўналишда ҳаракат қилмоқчи. Раҳбарият билан ўтириб, суҳбатлашдик ва улар янгича ёндашувни синаб кўришга қарор қилишди.
Ҳеч қандай хафагарчилик йўқ. Ҳаммаси яхши. Қўл бериб, қучоқлашиб хайрлашдик”, – деди Шацких.
Мураббий Қирғизистон чемпионатидаги тўртинчи ўринни ҳам баҳолади.
“Жамоани нолдан шакллантирдик. Бирорта футболчи ҳам, ходим ҳам йўқ эди. Ўтган йилнинг ноябридан буён жуда катта ишларни амалга оширдик.
Мавсумни тўртинчи ўринда якунладик, аммо кўрсатган ўйинимизга қараганда бундан яхшироқ натижага лойиқ эдик. Чемпионатда энг ҳужумкор ва томошабоп футбол намойиш этган жамоа бўлдик.
Аввалига ўз стадионимиз ҳам йўқ эди. Ҳозир стадион қурилди, ҳатто унда битта ўйин ўтказишга улгурдик. Аммо машғулот базаси ҳали ҳам йўқ. Машғулот майдонини баъзан беришарди, баъзан эса йўқ. Бундай муаммолар натижаларга ҳам таъсир қилди”, – деди мутахассис.
Шацких ҳозирнинг ўзида янги жамоада иш бошлашга тайёрлигини билдирди.
“Ҳеч қандай дам олиш режам йўқ. Янги лойиҳага киришиш ва янги вазифаларни бажаришга тўлиқ тайёрман. Таклифларни кутяпман”, – деди у.
Шунингдек, мутахассис Киевнинг “Динамо” клубидан ташқари, Украина Премьер-лигасидаги бошқа жамоалардан ҳам таклифларни кўриб чиқишга тайёрлигини айтди.
“Аниқ таклиф бўлса, уни кўриб чиқаман. Украинадаги вазиятдан қўрқмайман. Оилам ўша ерда – рафиқам, қизларим, куёвим ва набираларим. Аниқ таклиф тушиши билан чипта олиб, Украинага учаман”, – деди Шацких.
Маълумот учун, Максим Шацких 2025 йилнинг ноябрь ойида “Азия” бош мураббийи этиб тайинланганди. Унинг қўл остида жамоа Қирғизистон Премьер-лигасидаги дебют мавсумини 30 ўйинда 61 очко тўплаб, тўртинчи ўринда якунлади.
Шацких бунга қадар Ўзбекистонда “Пахтакор” ва “Андижон” клубларини бошқарган. У “Пахтакор” билан икки марта мамлакат чемпиони бўлган.
