– Ўйин ҳақида фикрингиз...
– Бугунги ғалабага тенг дуранг билан барча Андижондан келган мухлисларимизни, Андижон халқини, вилоят ҳокимимизни табриклаймиз. Йигитларга охиригача курашгани, характер кўрсатиб, ўйинни ташлаб юбормасдан охиригача ҳаракат қилгани учун каттакон раҳмат айтаман.
Ўйинга келадиган бўлсак, қийин кечишини билардик. Сабаби, ўз уйимизда "Сурхон" жамоасига ютқазиб қўйганимиз боис йигитларда бироз руҳий тушкунлик бор эди. Қолаверса, қатор жароҳатлар билан боғлиқ муаммоларимиз ҳам йўқ эмасди. Шунинг учун ўйин қийин бўлишини кутгандик ва якунда, Худога шукур, иккинчи таймда тизгинни ўз қўлимизга олиб, тўпни кўпроқ назорат қилиб, дурангга эришдик.
– Руҳият ҳақида гапирдингиз. "Сурхон"га қарши ўйиндан кейин ҳам шундай руҳий муаммолар бор, деб айтгандингиз. Шу ҳақда батафсилроқ билмоқчи эдим. Жамоада молиявий ҳолат яхши, деб эшитганман. Қолаверса, охирги натижалар ҳам ёмон эмас эди. Шу боис нега айнан руҳий муаммоларни ҳалигача бартараф эта олмаяпсизлар? Бу нимадан келиб чиқяпти?
– Йўқ, руҳий босим фақат пул билан боғлиқ эмас. Пул ва шароит томонлама жамоамизда ҳеч қанақа муаммо йўқ. Хорижга чиқиб, йиғинлар ўтказиб келдик, ҳамма шароитларимиз яхши. Асосий сабаб – учрашувлар орасида катта вақт бўлди, дам олдик. Уйимиздаги биринчи ўйинда мухлисларимизнинг босими ва йигитларнинг масъулияти – яъни, Андижон халқи олдида юзимиз ёруғ бўлиши кераклиги бироз босим ўтказиб қўйди. Йигитлар ўша ўйинда эркинроқ ҳаракат қила олишмади. Ўз-ўзидан уйда мағлубиятга учраганимиздан кейин яна кўпроқ руҳият устида ишлашимизга тўғри келди. Чунки мағлубиятдан кейин барибир бироз ишонч йўқолади. Биринчи таймда буни ўзимизда ҳис қилдик.
– Ўтган ўйиндан кейин "Андижон" клубига тегишли ФИФА тақиқини раҳбарият ҳал қилди, дегандингиз. Лекин бизнинг хабаримизга кўра, ҳали ҳам бу муаммо ҳал бўлмаган. Адашмасам, Артём Одинцов билан ҳисоб-китоблар ҳал қилинмаган экан. Шу ҳақда ҳам фикрингизни билдириб ўтсангиз.
– Бу ҳолат бўйича раҳбариятимиз билан гаплашган эдик. Қарздорликларнинг ҳаммаси ёпилиб, тўловлар ҳақидаги маълумот ФИФАга жўнатилган. Бу жараён банк орқали ўтади. Банкда қандайдир узилиш ёки тўхталиш бўлиб қолган. Лекин ФИФАга тўлов ҳақида хат юборилган. Аслида беш куннинг ичида ҳал этилиши керак эди. Худо хоҳласа, эртага тақиқимиз ечилиб қолса керак. Биз ҳам шуни кутяпмиз.
– Боаке ҳақида ҳам сўрамоқчи эдим. У катта маош эвазига олиб келинган эди, аммо сиз мураббийликка келгач, ҳатто қайдномадан ҳам ўрин олмай қолди. Унинг кетиши мумкинлиги ҳақида хабарлар чиқди. Қолаверса, Ашортиа ҳам бугун қайдномада кўринмади.
– Ашортиага келадиган бўлсак, сўнгги машғулотимизда жароҳат олгани учун уни ўйинга қўя олмадик. Боакега келсак, ёзги йиғинни Беларусда биргаликда ўтказдик. Бироқ жамоага келгач, жароҳат олиб, уйига даволанишга кетган эди. Кечагина келиб жамоага қўшилди, энди секин-секин уни ҳам тайёрлаб борамиз.
– "Андижон" бугун қайси жиҳатларда ютди-ю, қайси жиҳатларда ютқазди?
– Тўғриси, ўйинни қайта кўриб, таҳлил қилиб айтган осонроқ. Лекин бугун кўпроқ концентрацияда оқсаб, рақибнинг қарши ҳужумларини ўтказиб юбордик ва шу томонлама ютқаздик. Биринчи бўлимда ҳужумга ўтишга – биринчи пасни беришга бироз шошилдик. Иккинчи таймда эса тўпни назорат қилиб, ўз режамизни майдонга кўчирдик. Бу режамиз амалга ошди ва тўп назорати бизга ўтганидан кейин устунликка эришдик.
– Яқинда бир подкаст кўриб қолдим: таниқли хонанда Ғайрат Усмоновнинг фарзанди Муҳаммадали Усмонов ўтган мавсум "Андижон"да тўп тепган эди. Сиз ҳам йил бошидан бевосита бош мураббий бўлмасангиз-да, мураббийлар штабида эдингиз. Ғайрат Усмоновнинг айтишича, ўғли ўз туғилган юртида ўйнашни хоҳлаган, лекин унга имкон беришмади, қадрига етишмади, деган маънода фикр билдирибди. Бунга муносабатингиз қандай?
– Йўқ, Ғайрат Усмоновнинг ўғли келган пайтда мен жамоада йўқ эдим. Мен январда қўшилдим. Яъни, Самвел Вячеславовичнинг мураббийлар штабига яқинда – январда келдим. Ушбу лавозимга ўтганимдан кейин жамоада соғлом рақобатни йўлга қўйдик. Ким машғулотларда ҳаракат қилса ва ўзини кўрсата олса, қандай ном бўлишидан қатъи назар, асосий таркибда майдонга тушишга ҳақли. Шунинг учун ҳам эътибор берсангиз, ўзини кўрсатган ёшларимизни таркибга киритишни бошладик ва бу ўз самарасини беряпти. Бизда ким меҳнат қилиб, ўзини яхши томондан кўрсатса ва асосий таркибга лойиқлигини исботласа, барчага имконият берамиз.
– Жамоадаги оптимал таркибни аниқлай олмаганмисиз ёки бугунги тушган таркибни оптимал таркиб деса бўладими?
– Йўқ, бошиданоқ бизга юқори мақсад – учинчи ўрин вазифаси қўйилган. Шунинг учун жамоага 18-20 нафар тенг кучли ўйинчилар олиб келинган. Чемпионатимизнинг тиғизлигини ҳисобга олган ҳолда, барча футболчиларни тенг шакллантириб, ҳаммага имконият бериб, ротациялардан фойдаланмоқчимиз. Яъни, кучларни тўғри тақсимлаб ҳаракат қиляпмиз.
– Учинчи ўринни олиш имкониятини қанча фоизга баҳолайсиз?
– Биз, Худо хоҳласа, ҳар доим яхши ният қилиб, максимал ҳаракат қилаверамиз. Натижасини эса Аллоҳ беради. Фақат олдинга ҳаракат қилаверамиз.
– Сиз вақтинча бош мураббий вазифасини бажарувчи сифатида келганингиздан сўнг натижалар анча ижобий томонга ўзгарганди, аммо кейинчалик ғалабасиз серия юзага келди, худди бир вақтлар "Челси"даги Роберто Ди Маттео билан бўлгани каби... Ҳозир масалан, дуранг натижа ҳам раҳбариятни қониқтирмаса керак, бу ўзингизга ҳам қўшимча босим бўлмаяптими?
– Биринчи ўринда, барибир масъулият жуда ҳам катта. Очиғи, бизнинг халқимиз, мухлисларимиз жуда талабчан. Лекин вилоят ҳокимимиз билан кўришганимизда, у киши мени қўллаб-қувватлашларини, ортимда ўзлари туришини айтиб, "Қўрқмасдан ҳаракат қилавер," дедилар. Бизга берилган шу ишонч ортидан ҳаракат қиляпмиз.
