- Яхши ўйин бўлди. Иккала жамоа очиқ ўйин кўрсатди. Бундай ўйинларда ўйнаш ва томоша қилиш ёқимли. Ўйинни кўпроқ биз назорат қилдик. Сўнгги дақиқаларда концентрацияни йўқотиб қўйдик. Икки очко йўқотдик ва биттагина очко олдик.
- Александар Шушнярнинг ўрни қанчалик билинмоқда? Абдуллоҳ Йўлдошев бугун ёмон ўйнамади, гол ҳам урди, бироқ барибир 3та гол жуда кўп.
- Бир нима дейиш қийин. Шушняр яхши мавсум ўтказмоқда ва тартибли ҳаракат қилмоқда. Кучеренко ҳам. Абдуллоҳ Йўлдошев ўтган ўйинни яхши ўтказди. Бугун уни ёмон ўйнади деб айта олмайман. Балки кучлироқ рақиблар олдида унга бироз сифатлар етишмаётгандир. Шушняр-Кучеренко жуфтлигида эса бизда сифат яхшироқ кўринади.
- Учрашувнинг 10-дақиқасида "Локомотив"нинг голи ҳисобга олинмади ва тўп Темурхўжанинг қўлига тегди деб ҳисобланди. Бу вазиятни кўрдингизми?
- Йўқ, кўрмадим. Бу вазиятга баҳо бериш жуда қийин. Энди ўйинни кўриб чиқамиз. Бизда ўйинни ютиб кетиш учун бир қанча вазиятлар бўлганди. Ҳакам ўйинни унчалик яхши ҳис қила олмади. Бундай пайтда ҳакам ҳам ўзи истагандек ишлай олмайди. Ўша вазиятда ҳакам ҳақ ёки ноҳақ эди дея олмайман. Шунчаки 50/50 вазиятларда бош ҳакам кўпроқ "Андижон" фойдасига қарор чиқарди.
- Жаҳон чемпионати муносабати билан катта танаффус юзага келганди. Энди эса ҳар беш кунда ўйин бўлади. Жамоа бунга тайёрми?
- Тайёр бўлишимиз, исталган тизимга мослаша олишимиз керак. Агарда ҳар икки кунга ўйин қўйишса ҳам, бунга кўникиб кетишимиз керак бўлади. Агарда ҳар уч кунда ўйин бўлса ҳам, бунга кўникиб кетишимиз керак. Катта дамдан кейин энди иккинчи ўйинни ўтказдик ва секин-секин футболни тушуниб боряпмиз. Лекин Суперлиганинг бошқа ўйинлари ҳам темпи ва интенсивлиги ёмон эмас. Исталган жараёнда жамоалар йўқолиб қолишмайди.
- "Локомотив" ҳисоб 2:0 лигида учинчисини ҳам уриши керакдек кўринаётганди. Лекин 5 дақиқа ичида жамоа 2та гол қўйиб юборди. Нима сабабдан жамоа эътиборсизликка йўл қўйди?
- Кичик деталлар. Айнан шундай вазиятлар ўйин тақдирини ҳал қилади. Кичик деталларни ҳал қила олмас экансан, ўйин тақдирини ҳал қила олмайсан. Исталган одам хато қилади. Бу бирор футболчининг эмас, жамоанинг хатоси. Энди биз бу ишларни бошқача тарзда амалга оширишни ўйлаб кўрамиз. Кўп нарса футболчининг жисмоний ва руҳий ҳолатига боғлиқ. Одамлар ўз фикрларини билдираверишади. Лекин фикрларнинг ўзи ҳеч нимани билдирмайди.
- "Локомотив" 760 кундан кейин ўз стадионига қайтди. Янгиланган майдон ҳақида нима дея оласиз?
- 5-6 йил олдинги майдон яхшироқ эди. Ҳозир чим бироз бошқача ва нотекисдек. Олдинги чим бироз пастроқ ва текисроқ эди. Бу янги майдон, ўз майдонимиздек ҳис қилишимиз учун бироз вақт керак. Масалан, Сиз ҳам уй қурсангиз, жиҳозларни жойлаштирасиз ва барчасига кўникиб олишингиз учун вақт керак. Вақт ўтиб, майдонни ҳам ўзимизга бўйсундирамиз.
