– Натижа ҳақида сўрамоқчи эдим. Иккинчи бўлимда жамоа анча яхшиланди ва ўйин бошидагидан кўра анча мазмунли ҳаракат қилди. Шуни ҳисобга олсак, 3:1 ҳисоби сизни ранжитгандир ва ўйинга нисбатан бироз адолатсизлик бўлди, деб ўйламайсизми?
– Биласизми, бизга ўхшаган кичик жамоа бугунгидек меҳнат қилса, 1:3 ҳисобида ютқазиш бироз оғир ботар экан. Жамоамдан ўйинда диққатли бўлишни сўраган эдим. Биринчи бўлимда улар жуда ҳаяжонланишди, ўзларини йўқотиб қўйишди. Биринчи бўлимда фақат ҳимояланишни ўйлашди. Иккинчи бўлимда чап қанотда баъзи ўзгаришларни амалга оширишга тўғри келди, чунки биринчи бўлим менга ёқмади. Шу сабабли майдонга яна иккита ўйинчини туширдим, биз ўйнашни, ўйинни бироз кўпроқ назорат қилишни бошладик ва бир нечта имкониятлар бўлди. Лекин ўзингиз айтганингиздек, 1:3 – алам қиладиган натижа.
– Бугунги натижадан қатъи назар, Мексикада Ўзбекистонни, ўша минтақа футболини кўриш унчалик осон эмас. Натижани ҳисобга олмаганда, ўйин сифати, ёндашув ва жамоанинг ҳолати орқали дунёга кўрсатмоқчи бўлган нарсангиз шумиди? Ўзбекистон орқали дунёга нимани намойиш қилмоқчи эдингиз?
– Йўқ. Ўзбекистонга келганимдан бери шундай ишлашни бошладим, чунки Осиё жамоаси сифатида бизда жуда яхши салоҳият бор деб ҳисоблайман ва албатта, ўсишимиз керак. Мен доим йигитларга ўйинга тўлиқ диққатни қаратишни уқтираман, чунки Колумбия, Португалия каби терма жамоаларга қарши ўйнаш осон эмас. Албатта, 10 дақиқадан сўнг масофаларни йўқота бошлайсиз, кейин эса асабийлашасиз, чунки фақат тўпсиз югуришга тўғри келади. Тўпни олганингизда ҳам ўйнаш учун фикрингиз тиниқ бўлмайди. Лекин ўйлайманки, бугун жамоа қачон қийинчиликни енгиб ўтиш кераклигини, қачон тўпни назорат қилишни ва қачон бир қанотдан иккинчи қанотга ўтишни тушунди. Иккинчи бўлим жуда яхши бўлди, лекин бундай даражада хато қилсангиз, бунинг бадали жуда қимматга тушади. Ачинарлиси шунда.
– Фабио, сиз футболчи сифатида дунёнинг энг яхши майдонларида тўп тепгансиз, Италия терма жамоаси сардори сифатида 2006 йил Германияда жаҳон чемпиони бўлгансиз, "Реал Мадрид"да ўйнагансиз. Лекин, уч марта жаҳон чемпионатига мезбонлик қилган "Ацтека" стадионида ҳеч қачон бўлмагансиз. Бу майдонда бўлиш, мухлисларни кўриш ва бу ўйиндаги муҳитдан қандай таассуротлар олдингиз?
– Кеча ҳам айтган эдим, бу ерда ўйнаш – буюк шараф. Бу ерда тўп тепиш ажойиб, буни бутун умр эслаб юрасиз. Менинг футболчиларим бу стадионда биринчи марта ўйнашди, ўйлайманки, улар ҳам буни бир умр эслаб қолишади.
– Бугун мағлуб бўлган бўлсангиз ҳам, бу ўйиндан қандай ижобий жиҳатларни ўзингиз учун олдингиз? Ва яна бир саволим бор: деярли барча алмаштиришлардан фойдаланганингизни кўрдик. Иложи борича кўпроқ ўйинчиларга жаҳон чемпионатида ўйнаш имкониятини беришга ҳаракат қилдингизми ёки бу кўпроқ тактик режамиди?
– Йўқ, бу тактик режа эди. Албатта, биз жаҳон чемпионатидамиз. Бу шунчаки ҳаммага ҳам майдонга тушиш имкониятини беравериш дегани эмас. Ўйлайманки, бугунги баҳс футболчиларимиз учун жуда яхши тажриба бўлди. Чунки хато қилиб, бугунгидек товон тўлаганингизда, бу келажакда ёдингизда қолади. Мен доимо улардан марказ орқали ўйнамасликни сўрайман, лекин улар марказ орқали ўйнашди ва шундан сўнг биз иккинчи голни ўтказиб юбордик. Тўпни ён чизиқдан ташлашда ҳам хатоларга йўл қўйдик.
– Мағлубиятдан ташқари, бугунги ўйиндан ўзингиз учун қандай сабоқ чиқардингиз? Жамоангизнинг қайси ҳаракатларини эътироф этасиз? Кейинги ўйинга тайёргарликни бошлаш учун кийиниш хонасида нималарни айтдингиз?
– Мен улар билан гаплашдим. Улар кўрсатган ўйиндан фахрланишимни, ҳаракатлари менга жуда ёққанини айтдим. Албатта, бугун биринчи ўйин эди, шунинг учун уларга қаерда эканлигимизни тушуниш бироз қийин бўлди. Аслида Мексикада эмас, балки стадиондаги мухлисларни ҳисобга олсак, гўёки Колумбияда ўйнагандек бўлдик. Лекин уларга тайинлаганимдек, дастлабки 20 дақиқада жуда эҳтиёт бўлиш керак эди. Кейин эса ўша хатога йўл қўйдик ва бу бизга қаттиқ таъсир қилди. Чунки биринчи бўлимда 0:1 ҳисобида ортда бораётганингизда, бу руҳий жиҳатдан халақит беради. Шунга қарамай, умумий ўйинимиз ёмон чиқмади деб ўйлайман. Кейинги ўйинлар умуман бошқача бўлиши табиий. Португалия ва Колумбия – умуман бошқа-бошқа жамоалар ва бугун Португалия дуранг ўйнади. Демак, улар 100 фоиз ғалаба қозонишлари керак. Кўрамиз, нима бўларкин.
– Фабио, бугун стадион тўлиқ сариқ рангга бурканганини кўрдик. 80 000 мухлис қаршисида, сафарда ўйнаш қанчалик оғир бўлди ёки қандай ҳис-туйғуларни уйғотди?
– Йўқ, мен бундай туйғуни кўп бор ҳис қилганман. Албатта, футболчиларимга айтганимдек, мен Нидерландияда Европа чемпионатининг ярим финалида ғалаба қозонганман, ўшанда бутун стадион уларни қўллаб-қувватлаган эди. Дортмундда, барча немислар қаршисида ярим финалда ютганман. Баъзан бу сизга кўпроқ мотивация беради. Ўйлайманки, бу ҳолат уларга ҳам шундай таъсир қилди.
– Гуруҳдаги Португалия ва Конго ўртасидаги ўйин дуранг билан якунланганини ҳисобга олсак, Колумбияга қарши бу ўйиндан қандай хулоса чиқардингиз?
– Хулоса шуки, кийиниш хонасида футболчиларга ҳам айтганимдек, бу даражадаги мусобақада хатоларни камайтириш керак. Чунки кўп хато қилиш – катта муаммо. Менимча, биринчи голни ўзимиз совға қилдик, чунки бироз дангасалик қилдик ва бўш ҳудудга кириб келган футболчини кузатиб бормадик. Жарима зарбасини олдинга тепишимиз керак эди, аммо марказга узатдик... Шубҳасиз, биз камроқ хато қилишимиз шарт.
– Фабио, футболчиларингизнинг ўйинни якунлаш тарзи ва яратилган бир нечта имкониятлар уларда тўсатдан "биз шу ерга муносибмиз" деган ишонч уйғотгандек туюлди. Бу Португалияга қарши ўйинда муҳим аҳамиятга эга бўладими?
– Албатта. Биринчи бўлимда футболчиларимга тўп бизда бўлганида кўпроқ ҳаракат қилишимиз кераклигини, қўрқмаслигимиз лозимлигини айтдим. Агар ўйнаш учун ўзимизда жасорат топа олмасак, қулай бўш ҳудудларни топа олмасак, қийин бўлади. Иккинчи бўлим анча яхши ўтди. Умид қиламанки, Португалияга қарши ўйинни кўпроқ ўзлигимизни кўрсатиб, ўйнашга интилган ҳолда, янада дадилроқ бошлаймиз. Акс ҳолда, қийин бўлади.
– Сиз бугун ўта ҳимоявий, 5-4-1 тактикасини майдонга туширдингиз. Бутун ўйин давомида деярли шу тизимда ўйнадингиз. Бу билан нимани кўрсатмоқчи эдингиз? Колумбияга бўлган ҳурматними ёки рақиб хатосига таяниб ўйнамоқчимидингиз? Якунда сизда имкониятлар бўлди ва натижа бошқача бўлиши ҳам мумкин эди.
– Йўқ, бу мен Ўзбекистонга келгунимга қадар фойдаланиб келинган тизим. Олдинги мураббийлар ҳам шундай ўйнашган ва мен буни ўзгартиришни хоҳламадим. Баъзида бу шундай тизимки, агар уни тўғри қўлласангиз, тўп сизда бўлганда ҳам маълум устунликлар бериши мумкин. Шунинг учун бу схема менга ёқади ва уни ўзгартирмадим. Айниқса, 4-4-2 ёки 4-3-3 тактикасида ўйнайдиган жамоага қарши майдонга тушганингизда ўйин тизимлари сизга ёрдам бериши мумкин. Бироқ якунда барибир ўйинчиларнинг маҳорати ҳал қилувчи рол ўйнайди деб ҳисоблайман. Бугун ҳам бу ўз сўзини айтди.
– Гуруҳдаги дастлабки икки жамоа ўртасидаги биринчи ўйин натижасини билган ҳолда майдонга тушиш сизда қандайдир ўйлар уйғотдими ёки режаларингизни ўзгартиришга мажбур қилдими? Ахир бугунги ўйинда ғалаба қозонган жамоа гуруҳ пешқадамига айланар эди.
– Қандайдир умидлар бўлиши мумкин эди, аммо биз ўз даражамизни ҳам тўғри баҳолашимиз керак. Колумбия ёки Португалия каби жамоаларга қарши майдонга тушганда ғалаба қозониш осон эмас. Албатта, бунинг учун бор кучингизни беришингиз мумкин, лекин мукаммал ўйин ўтказиш талаб этилади. Бугун айрим хатоларга йўл қўйдик ва бунинг учун жуда қиммат товон тўладик. Шуниси аниқки, ўйинга тайёргарлик кўраётганда ҳар доим ғалаба учун тайёрланасиз, лекин шу билан бирга қандай мағлуб бўлишни ҳам билиш керак.
