Ўйиндан кейин "Лочин" бош мураббийи Элдор Мойлиев матбуот анжуманида иштирок этди.
- Ўйин ҳақида фикрингиз?
- Учрашув қийин ўтишини билардик. "Олимпик Мобиуз"ни яхши биламиз, жамоада меҳнаткаш футболчилар йиғилган. 3:1 ҳисобида ютаётганимизда ҳам ҳушёрликни йўқотмадик. Рақиб кейинчалик яна битта гол урди, биз эса тўп назоратига ўтдик. Қийин ўйин бўлди, ҳам ҳавоям иссиқ бўлди. Ғалаба қозонганимиз учун футболчиларга раҳмат айтаман.
- Ёзги танаффусда жамоангизга уч нафар футболчи келиб қўшилди. Ҳар учала футболчи бугун майдонга тушиб ўзидан яхши таассурот қолдирди. Трансферлардан қанчалик кўнглингиз тўлди?
- Етти нафар футболчи биз билан хайрлашди. Уларга яхши таклиф бўлди, биз ҳам йўқ демадик. Ҳозирги қўшилганлар "Шўртан", "Бухоро", "Насаф" каби яхши жамоалардан келган. Бу футболчиларни ёшлигидан биламан, уларда ўйин амалиёти кам эди, насиб қилса бизда кўп ўйинларни ўтказишади.
- Абдувоҳид Охтоев асли ҳужумчи, лекин сизнинг қўл остингизда турли чизиқларда ҳаракат қиляпти.
- Охтоев яхши хушчақчақ йигит. У ҳужумда ҳам, ўртада ва қанотларда ҳам ўйнай олади. Характери ҳам яхши, қўрқмасдан футбол ўйнайди. Жамоада шундай футболчи бўлгани яхши. Унга янада кўпроқ имкон беришга ҳаракат қиламиз.
