- Ўйин ҳақида фикрингиз?
- Ўйинни қандай ўтказганимизни тушунмай қолдим. Баҳсни яхши бошладик, иккита гол урдик. Лекин иккинчи бўлимда ҳаммаси ўзгарди. Бу биз учун мавсум бошидан бери "касаллик" бўлиб қоляпти. Тенгма-тенг курашларда гол ўтказяпмиз. Кейин хатолар бўляпти ва орқага ётиб оляпмиз. Муҳими, ғалаба қозондик ва мухлисларимизни табриклайман. Ишқибозларимиз доим яхши ўйин ва ғалаба кутишади, улар бунга ҳақли. Бу стадион мен учун омадли эмас. Охирги марта бу ерда қачон ютганимизни аниқ эслай олмайман, адашмасам "Локомотив" билан келганимда ютиб кетгандик. Бунга ҳам анча вақт бўлди.
- Бугун Сервер Жепаровнинг ўғли Рауль Жепаров "Динамо" сафида Суперлигада дебют қилди.
- У ҳали анча ёш, хатолар кузатилди, лекин ҳаракат қилгани билан табрикласа бўлади. Рауль биринчи таймда тўғри ўйнади, ўзини йўқотиб қўймади. Фақат жисмоний кучи етмай қолганидан захира сўради. Легионерларга ҳам унчалик эътироз йўқ, бироқ иккинчи таймдаги ўйинни зўр демаган бўлардим.
- "Динамо" итальянча футболга ўтиб олгандек кўринди: гол уряпти, кейин ҳисобни сақлашга ўйнаяпти.
- Бугун кўрдингиз, иккинчи бўлимда оддий вазиятларда тўғри пас бера олмадик. Бунақа ўйнаш керак эмас. Бундай об-ҳавода хато қимматга тушади.
- Статистикага кўра, Абдураҳмонов, Амонов, Ҳожимирзаев триоси энг яхши ҳужум учлиги бўлиб қолмоқда. Уларга ҳам эътирозингиз борми?
- Азиз Амонов Жаҳон чемпионатида ўйнаб келди ва ҳозир унда бироз пасайиш кузатилмоқда. Уни яна юқори даражага олиб чиқишимиз керак. Азиз майдонда етакчи бўлиши лозим.
- Жаҳонгир Ўрозов бугун қайдномада кўринмади.
- Унга Россиянинг "Рубин" клубидан хат келди. Ўз навбатида биз ҳам бу хатга жавоб бердик. Хуллас ҳар иккала клуб футболчи трансфери бўйича келишиб олдик. Энди ҳамма гап Ўрозовнинг ўзида қолди. Жаҳонгир тез орада "Рубин" билан шартнома имзолаши мумкин.
- Сиз "Динамо"да бешинчи мавсум фаолият олиб боряпсиз. Сўрамоқчи бўлганим, U-21 жамоасига эътибор қандай? Нечта футболчи асосий таркибга жалб қилинди?
- Мен тўртинчи йил ишлаяпман. Ўтган йил бир нечта ёшларни синаб кўрдик ва фақат Абдураҳмоновни олдик. Бошқа футболчилар кўрикда бўлди. Афсуски, ҳозир жамоани кучайтира оладиган ёшлар йўқ. Мен келганимда маҳаллий ўйинчилар кўп эди, бироқ улар бошқа жамоаларга ўтиб кетишди. Биз ҳам ўз тарбияланувчиларимиз кўпроқ бўлишини хоҳлаймиз ва бунинг устида иш олиб борамиз.
