Ro'ziqul Berdiev: "Suyunov muhim musobaqalarda o'zini ko'rsatishi kerak!"

-   Bugun juda og'ir o'yin bo'lib o'tdi. Raqib jamoa himoyaviy o'yin ko'rsatganda gol urish tobora qiyinlashadi. O'yin boshidagi imkoniyatlardan foydalana olmaganimiz futbolchilarni asabiylashtirdi. Muhimi uch ochkoni qo'lga kiritdik.

-  Artur Gevorkyan ko'p xatoga yo'l qo'ydi. Bugun u o'ziga o'xshamadi?

-  Uchrashuv boshida penaltini amalga oshirolmagandan so'ng uning kayfiyati tushib ketdi. Xatolari shu bilan bog'liq.

-  Hujumchilar o'z vazifalarini bajara olishmayapti?

-  Har bir hujumchimizga imkoniyat bermoqdamiz. Negadir gol urish qiyin kechmoqda. Yana bir tomoni biz uy uchrashuvlardan ko'ra safarda yaxshiroq o'ynayapmiz. Safarda jamoalar himoyada yotib olishmaydi.

-  Jarima maydonchasi tashqarisidan zarbalar yo'llanmayapti?

-  Menimcha, unaqa futbolchilar kamayib ketmoqda. Nafaqat “Nasaf”da, balki O'zbekiston chempionatida uzoqdan ishonch bilan zarba beradigan futbolchilar juda kam.

-  SHohruh Gadoev kecha o'rinbosarlar tarkibida to'p surdi. Uni qachon asosiy tarkibda ko'ramiz?

-  SHohruh hali asosiy jamoada o'ynashga tayyor emas. Jarohatdan endigina tuzaldi, u hali to'liq formaga kirib olgani yo'q. Uni hozirdan qiynab, yana jarohatini yangilab qo'yishni istamaymiz.

-  O'tkir Yusupov to'g'risida fikringiz?

-  Yusupov ikki o'yinda ham darvozani ishonchli qo'riqlab Suyunovning yo'qligini bildirmadi. U kelajagi bor darvozabon hisoblanadi.

-  Eldorbek Suyunovni Nesterovga munosib o'rinbosar sifatida ko'rsak bo'laveradimi?

Suyunov terma jamoa tarkibida muhim turnirlarda qatnashgani yo'q. Muhim musobaqalar uning kelajagini belgilaydi. Hozirdan xulosa chiqarishga erta!