Hakim Fuzaylov: "Bahs davomida yaqqol ustunlik qila olmadik"

- O'yin haqida fikringiz?

- Bugun ikkala jamoa ham o'zini ko'rsatishga va chiroyli futbol namoyish etishga harakat qildi. Avval ham aytib o'tgandim, o'yinlar orasi qisqa va vaqtimiz tezroq tiklanib olishga ketib qolyapti. Bahs davomida yaqqol ustunlik qila olmadik va bitta gol urish bilan cheklandik. Hamma o'yinlar biz uchun qiyin bo'lyapti. Menimcha, jamoalar ikki toifaga - medallar uchun kurashadigan va Superligada qolish uchun harakat qiladigan jamoalarga ajralib bo'ldi.

- Abbos Otaxonov jamoaga qnchalik qo'shilib keta oldi?

- U safimizga biroz kech qo'shildi. Abbos bungacha Malayziyada to'p tepayotgandi. U sekin-asta jamoamizga qo'shilib ketadi. Otaxonov tajribali futbolchi bo'lgani bois jamoamizga qo'shilib ketishi ko'p vaqt olmaydi.

- Jamoangiz oxirgi daqiqalarda to'p o'tkazib yubordi.

- Menimcha, bizga ozgina hushyorlik etishmadi. Bu esa tabimizni xira qildi. Albatta, xatolar ustida ishlaymiz. Navbatdagi bahsni Urganchda o'z maydonimizda o'tkazamiz. Bilishimcha, Xorazmda 15 yil oliy liga o'yini bo'lmagandi. Mana endi buning fursati keldi. Ko'p muxlislar kelishidan umidvormiz. Biz esa o'zimizni ko'rsatib g'alaba qozonishga harakat qilamiz. Hozir har bir ochko qadrli. Maqsadimiz esa Superligada o'z o'rnimizni saqlab qolish.

- Statistika shuni ko'rsatyaptiki, "Xorazm" "Buxoro"ga qarshi bungacha bo'lib o'tgan 6ta o'yinning hammasida mag'lubiyatga uchragan ekan.

- "Buxoro" - kuchli jamoa, bu jamoa bejizga Superligada to'p tepayotgani yo'q. Avvalgi o'yinlarga kelsak, har bir mag'lubiyatning o'z sababi bo'ladi. Lekin men o'zim jamoani boshqarmagan yillarda nima bo'lganini bilmayman. Yana bir gapni aytishim mumkin, futbolni pullar o'ynamaydi, futbolni futbolchilar o'ynaydi. Har bir o'yinimizda ishtiyoq etarlicha bo'lyapti, faqat koncentraciyani tez yo'qotib qo'yyapmiz