"Olmaliq": Tayyorgarlik reja asosida kechmoqda

"Mashal" jamoasi bilan o'tgan bahsdan so'ng, jamoamiz bosh murabbiyi Igor Anatolevichdan tayyorgarlik jarayoni xususida suhbatlashdik.

Igor Anatolevich "Olmaliq" jamoasini bu yil ko'plab futbolchilar tark etishdi. Jamoaning yangi mavsum tayyorgarligi xususida so'zlab bersangiz.

- Darhaqiqat, bu yil jamoani juda ko'p futbolchi tark etdi. Bu bizni navbatdagi mavsumdagi faoliyatimizga salbiy tasir o'tkazadi deb o'ylash noto'g'ri bo'ladi. Jamoadan ketgan birgina Sanjar SHoahmedov biz uchun yo'qotish bo'ldi. Boshqa futbolchilar bilan hamkorlikni davom ettirish yangi mavsum rejasida yo'q edi. SHu sababli, bundan fojea yasash kerak emas. Yangi mavsumga tayyorgarlik haqida aytadigan bo'lsam, jamoa 15 dekabrdan Olmaliq shahrida mashg'ulotlarga kirishdi. Birinchi yig'inda bir qator yoshlarni sinovdan o'tkazib oldik. 5 yanvardan boshlangan yig'inda tajribali futbolchilar ham qo'shilishdi. Yana ikki kun Olmaliqda mashg'ulotlar davom etadi. 15 yanvardan esa Toshkentda to'planamiz. Tayyorgarlik shu tariqa davom etadi.

Jamoaning o'tgan mavsumdagi natijasidan qoniqish hosil qildingizmi?

- Yo'q albatta, o'tgan yilgi chempionatda jamoa oldiga minimum 2013 yilgi o'rinni saqlab qolish vazifasi qo'yilgandi. Afsuski, jamoa bir pog'ona past o'rin bilan chempionatni yakunladi.

Yig'inda qatnashayotgan futbolchilarning ko'pchiligi olmaliqlik muxlislar uchun yangilik...

- Ha bu yil jamoa tarkibi tubdan o'zgaradi. Ayni vaqtda jamoa mashg'ulotlarida qatnashayotgan futbolchilarning aksariyati bilan shartnoma imzolandi. Azamat Bobojonov va Akmal Bozorov hozircha ko'rikdan o'tishmoqda. SHuningdek, xorijdan kelgan futbolchilar ham shu kabi holatda. Toshkentdagi yig'inlar davomida yana bir qator legionerlar ham ko'rikka taklif etiladi.

Bugungi kabi nazorat o'yinlari poytaxtda ham o'tkazilsa kerak.

- Ha, rejamizda 17 yanvar kuni "Qo'qon-1912", 19 yanvar "Neftchi", 22 yanvar "Buxoro", 24 yanvarda esa "Navbahor" jamoalari bilan o'rtoqlik o'yinlari o'tkazish bor. Bundan tashqari 27 va 31 yanvarda ham nazorat o'yini o'tkazamiz. Yanvarning so'nggi sanasida Bekobodning "Metallurg" jamoasi bilan o'ynaymiz. 27 yanvardagi raqib ham shu kunlarda aniq bo'ladi. 

Kichik suhbat uchun tashakkur, navbatdagi mavsumda jamoaga omad yor bo'lsin.

- Rahmat.