Davron Fayziev: "Bugun eng yaxshi o'yinchi sifatida darvozabonimizni aytgan bo'lardim"

O'yin haqida

— Barchani uzoq kutilgan g'alabani bilan tabriklayman. Farg'ona viloyatida kecha boshlangan o'zbek futbolining 110 yillik bayrami bugun yakunlandi. Futbol faxriylari ham bu erga tashrif buyurishdi. Bugungi g'alaba ham ushbu bayramga to'g'ri keldi. Ushbu g'alabani Qo'qon ahliga va futbolimizning 110 yillik bayramiga bag'ishlayman. O'yindan avval katta yo'qotishlar bor edi. Lekin yigitlar iroda namoyish etishdi. O'yin 1:1 hisobida davom etayotgan paytda, kim gol ursa, o'sha g'alabani qo'lga kiritardi, "So'g'diyona" ham yutib ketishi mumkin edi, lekin omad bizga kulib boqdi. So'nggi daqiqada kiritilgan to'p evaziga g'alabaga erishdik. Bizga ishonch bildirgan klub rahbariyati, muxlislar, umuman, barcha-barchaga ushbu g'alabani bag'ishlayman. "So'g'diyona" jamoasiga kelgusi o'yinlarda omad tilayman. Ikki jamoa ham bir xil vaziyatda edik. CHunki raqibdan ham mag'lubiyatlardan keyin bizdagi kabi tushkunlik kayfiyati bor edi. Bizda jarohat olgan futbolchilar ko'p edi, ularning bazilarini maydonga tashlashga majbur bo'ldik. O'yin davomida xatolar kuzatildi. Biroq g'alabadan so'ng barchasi unutiladi. O'yin muxlislarimizga yoqdi deb o'ylayman. 

— Hujumchi Norbekov jarohat olgach, uning o'rniga poziciyadoshi emas, himoyachini tushirganingizni qanday izohlaysiz?

— Hisobdan kelib chiqqan holda o'zgarishni amalga oshirdik. Taktik o'zgarish deyish mumkin. Hasanov, Norbekov kabi futbolchilar bugun isitma bilan maydonga chiqib, jamoa g'alabasiga hissa qo'shdi. Ularni faqat olqishlash kerak. Yuqorida takidlaganimdek, yo'qotishlar bizga katta tasir o'tkazayotgandi. O'ylashimcha, g'alabadan so'ng yigitlarda ishonch paydo bo'lmoqda. Almashtirishni to'g'ri deb hisoblasak bo'ladi, chunki g'alaba qozondik. "So'g'diyona" yomon o'yin ko'rsatmadi. Ular qarshi hujumlar tashkil qilishga urinishdi. Ikkala jamoa ham teng vaziyatlar yaratdi. Norxonov gol urganda, yutqazishimiz mumkin edi. Uchrashuv oxirida g'alabani "ilib ketdik". 

— "Qo'qon-1912" hozirgi o'rnida mavsumni yakunlasa, pley-offda ishtirok etadi. Jamoa ushbu bosqichda qaerda o'ynash qulay?

— Hozir bu haqda fikr bildirishga ojizman. Faqat oldinga qo'yilgan maqsad sari intilamiz. Qolgani Allohdan. Biz g'alabani uzoq kutgandik. Hozir raqib tanlaydigan holatda emasmiz. 

— Siddiqov va Yosovichning holati qanday?

— Yosovich mavsum oxiriga qadar bizga yordam bera olmaydi. "Paxtakor"ga qarshi o'yinda Siddiqovning jarohat olishiga men aybdorman. Uni birinchi bo'limdan so'ng almashtirishim kerak edi, chunki u jarohatini yangilab olgandi. Uning holatini bila turib, maydonga chiqarganim xatoim bo'lsa kerak, deb o'ylayman. O'ylaymanki, Javohir kelgusi o'yinlarda bizga yordam beradi. Uning holati yaxshi tarafga o'zgargan. Javohirni har bir klub o'z tarkibida ko'rishni xohlaydi. Qolaversa, Rahmatullaevning isitmasi bor, shu bois u o'yinga ham kela olmadi. Sanasak, 6-7 futbolchida jarohat bor. Sardor Etovqo'ziev bugun debyutini o'tkazdi. Yoshlarga ishonch berish kerak. Toshmirzaevni borasida ham majburiy o'zgarish amalga oshirdik. CHunki Hasanov isitmasi yuqoriligi sababli zaxiraga olindi. Lekin bu o'zgarish o'z samarasini berdi. Xatolar kuzatildi, biroq o'z vaqtida bartaraf etildi. SHundan xursandman. Bugun eng yaxshi o'yinchi sifatida darvozabonimizni aytgan bo'lardim. Aslida g'alaba uchun barchani etirof etish mumkin. Biroq ajratib ko'rsatadigan bo'lsak, Abdullaev, Xolmuhammedov va Rustamovni ajratib ko'rsatish mumkin. Gol urgan o'yinchi esa — qahramon. Uni barchadan yuqori qo'yish mumkindir.