Uni muxlislar 1998 yil "Paxtakor"ni chempion qilgani va Osiyo o'yinlariga olib borgani orqali yaxshi tanishadi.
O'shanda u murojaatimni o'qigan va savollarimga javob qaytargandi. Veyga da Silva bugun oramizda yo'q, lekin u bilan tashkillashtirilgan 6 yil oldingi intervyu shaxsiy arxivimda saqlanib qolingan ekan. 1998 yilgi Osiyo o'yinlarini yodga olish bahonasida braziliyalik murabbiy bilan kichik suhbatni e'tiboringizga havola qilamiz.
- Janob murabbiy, O'zbekistonda ishlagan davringizni qanday eslaysiz?
- Xotiralarim juda yaxshi. Har holda "Paxtakor"da muvaffaqiyatli natijaga erishdim. Fikrimcha, terma jamoadagi faoliyatim ham yomon kechmagan.
- Futbolchilarni aytishicha, mashg'ulotlarga yangilik olib kirgan ekansiz...
- Ha, bu to'g'ri. Mashg'ulotlarni rezina to'p bilan ishlashdan boshlardik. Shundan so'ng odatiy to'pga o'tilardi. Mirjalol Qosimovda texnika ajoyib edi. U barcha talablarga javob berardi. Igor Shkvirin ham juda zo'r ijrochi sifatida yodda qolgan.
- O'zbekiston terma jamoasida ko'proq imkoniyat olmaganman deb hisoblaysizmi?
- To'g'risi, yo'q. O'shanda nega iste'foga chiqarilganimni aytishmagan. O'zim ham qiziqish bildirmaganman. Meni "Paxtakor"ga taklif qilganlar ishimni kuzatishgandi, qanday murabbiyligimni bilishardi.
- Mo'g'iliston bilan 15:0 o'yin haqida gapirmasak bo'lmaydi...
- Hammasi oddiy. Raqib juda va juda kuchsiz edi, xolos. Bunga alohida jiddiy to'xtalish kerak emas.
- O'zbekistonda sizni xayron qoldira olgan 3 nafar futbolchini ayta olasizmi?
- 3 nafar juda kam. Qo'l ostimda Bugalo, Fyodorov, Shirshov,, Qosimov, Shkvirin kabi ajoyib nomlar bor edi.
- O'shanda JCH-1998 saralash bahslarining oxirida terma jamoani qabul qilgandingiz. Ertaroq kelganingizda natija qanday bo'lardi?
- Kech tayinlanishim o'zimga bog'liq emasdi.
Ma'lumot uchun, Ubiraja Veyga da Silva O'zbekiston milliy terma jamoasini jami 9ta rasmiy, 2ta o'rtoqlik o'yinida maydonga boshlab tushgan: 5ta g'alaba, 4ta durang va 2ta mag'lubiyat qayd etgan.
