Уни мухлислар 1998 йил "Пахтакор"ни чемпион қилгани ва Осиё ўйинларига олиб боргани орқали яхши танишади.
Ўшанда у мурожаатимни ўқиган ва саволларимга жавоб қайтарганди. Вейга да Силва бугун орамизда йўқ, лекин у билан ташкиллаштирилган 6 йил олдинги интервью шахсий архивимда сақланиб қолинган экан. 1998 йилги Осиё ўйинларини ёдга олиш баҳонасида бразилиялик мураббий билан кичик суҳбатни эътиборингизга ҳавола қиламиз.
- Жаноб мураббий, Ўзбекистонда ишлаган даврингизни қандай эслайсиз?
- Хотираларим жуда яхши. Ҳар ҳолда "Пахтакор"да муваффақиятли натижага эришдим. Фикримча, терма жамоадаги фаолиятим ҳам ёмон кечмаган.
- Футболчиларни айтишича, машғулотларга янгилик олиб кирган экансиз...
- Ҳа, бу тўғри. Машғулотларни резина тўп билан ишлашдан бошлардик. Шундан сўнг одатий тўпга ўтиларди. Миржалол Қосимовда техника ажойиб эди. У барча талабларга жавоб берарди. Игорь Шквирин ҳам жуда зўр ижрочи сифатида ёдда қолган.
- Ўзбекистон терма жамоасида кўпроқ имконият олмаганман деб ҳисоблайсизми?
- Тўғриси, йўқ. Ўшанда нега истеъфога чиқарилганимни айтишмаган. Ўзим ҳам қизиқиш билдирмаганман. Мени "Пахтакор"га таклиф қилганлар ишимни кузатишганди, қандай мураббийлигимни билишарди.
- Мўғилистон билан 15:0 ўйин ҳақида гапирмасак бўлмайди...
- Ҳаммаси оддий. Рақиб жуда ва жуда кучсиз эди, холос. Бунга алоҳида жиддий тўхталиш керак эмас.
- Ўзбекистонда сизни хайрон қолдира олган 3 нафар футболчини айта оласизми?
- 3 нафар жуда кам. Қўл остимда Бугало, Фёдоров, Ширшов,, Қосимов, Шквирин каби ажойиб номлар бор эди.
- Ўшанда ЖЧ-1998 саралаш баҳсларининг охирида терма жамоани қабул қилгандингиз. Эртароқ келганингизда натижа қандай бўларди?
- Кеч тайинланишим ўзимга боғлиқ эмасди.
Маълумот учун, Убиража Вейга да Сильва Ўзбекистон миллий терма жамоасини жами 9та расмий, 2та ўртоқлик ўйинида майдонга бошлаб тушган: 5та ғалаба, 4та дуранг ва 2та мағлубият қайд этган.
