Ўйиндан кейин "Ғазалкент" бош мураббийи Зайниддин Тожиев матбуот анжуманида иштирок этди.
- Ўйин ҳақида фикрингиз?
- Бугун жамоамизни таний олмадим, футболчиларимиз нимагадир суст ҳаракат қилишди. Ўйинни ўрганиб тегишли хулоса чиқарган ҳолда жамоани тиклашга ва кейинги ўйинга тайёрлашга ҳаракат қиламиз. Навбатдаги баҳсимиз "Шўртан"га қарши кечади, шу учрашувга ҳозирлик кўрамиз. Ўйинга келадиган бўлсак, бизда ҳам, "Жайхун"да ҳам ғалаба қозониш учун имконият бўлди. Лекин дуранг ҳақли натижа деб ҳисоблайман.
- "Жайхун" эгаллаб турган ўриндан келиб чиқиб осон ютамиз деган хаёл бўлмадими?
- Йўқ. Футболчиларга кўрсатма пайтида ҳам айтдик, аввало кучли хоҳиш бўлиши керак. Бугун кимнинг хоҳиши юқори бўлса, шу жамоа ютиб кетишини ва ўйин курашларга бой кечишини билардик. Шунга яраша тайёргарлик кўргандик. Балки бу чарчоқ аломатлари йиғилиб қолганиданми.
- Голли вазиятлар бўлди, лекин фойдаланишга келганда оқсаш кузатилди. Бунга нима дея оласиз?
- Барибир кўп нарса чарчоқ билан боғлиқ, кейин концентрация ҳам етмаяпти. Футбол майда деталлардан иборат, ҳаммасига жиддий эътибор қаратиш керак. Футболчиларимиз ҳали ёш, тажриба тўплаб боришяпти.
- Мирқодировнинг йўқлиги қанчалик билинди?
- Энди барибир Мирқодировнинг ўрни билинади, у жамоамиз сардори ва жамоани елкасида кўтаришга ҳаракат қилади. Жамоада етакчи бўлиши керак, кимдир юкни ўзига олиши лозим. Бугун бизга мана шундай етакчи етишмади. Бу борада жамоа билан гаплашамиз. Футболчиларда ўзига бўлган ишонч ортиши лозим.
- Бугун Ибодуллаев билан Файзуллаев ўз даражасидан паст ҳаракат қилди деган фикрга қўшиласизми?
- Бугун бутун жамоа ўз даражасига нисбатан паст ҳаракат қилди. Футболчиларни таний олмадим. Ҳар ўйинда 4-5та вазият яратиб келаётгандик, бугун кўп вазият бўлмади. Олдинга ҳам қўрқув билан чиқдик. Айтиб ўтганимдек, буни чарчоқ билан боғлайман.
