- Ўйин ҳақида фикрингиз?
- Яхши учрашув гувоҳи бўлдик. Фақат биз ўзимизга ўзимиз голларни олиб келдик. Рақиб меҳнат қилиб тўп киритди дея олмайман, ҳаммасига ўзимиз сабабчи. Тўғриси, "Каттақўрғон" жамоасидан бундай ўйин кутмагандим, вақтни чўзиш мақсади бор жамоага ярашмайди деб ўйлайман. Бунинг устига ҳакамлар ҳақида гапиравериб чарчадим. Уч дақиқа қўшган бўлса, шундан бир дақиқаси сариқ карточка бериш билан ўтди. Замонавий футболга умуман тўғри келмайдиган ҳолат. Майдонга чиққандан кейин одам роҳат олиб футбол ўйнаши керак. Гол ургандан кейин ётиб олиш ярашмайди. Мухлислар ҳам чиройли ўйин кўрамиз деб стадионга келишади. Тушунаман, натижа керак, лекин барибир футбол биринчи ўринда туриши лозим.
- Бугун рақиб сафида беш нафар янги футболчи майдонга тушди. Таркибдаги ўзгаришлар сиз учун қанчалик кутилмаган бўлди?
- Менга бунинг умуман фарқи йўқ. Таркибни ўрганишга ҳаракат ҳам қилмадим. Мен учун ўз жамоамнинг кўрсатадиган ўйини муҳим. Ўзимизда муаммолар етарли, тўрт нафар футболчимиз бугун ўйнамади. Агар шулар майдонда бўлганида баҳс бошқача кечган бўларди. Ким келди, ким кетди - доим бунга қараш керак эмас, барибир ҳамма жамоалар билан ўйнаймиз.
