- Ўйин ҳақида фикрингиз?
- Жуда қийин баҳс бўлиши аниқ эди, шунга яраша йигитларни жиддий тайёрладик. Оралиқ танаффус берилгани бизга қўл келди. 0:2 ҳисобида ортда бораётиб ўзимизда куч топа олдик ва 3:2 ҳисобида ғалаба қозондик. Бунинг учун футболчиларимизга катта раҳмат. Биласиз, жамоамиз ёшлардан иборат ва бу каби ўйинлар тажриба тўплашда қўл келади.
- Ўзингиз айтиб ўтгандек "Ғазалкент" асосан ёшлардан иборат. Ҳисоб 0:2 бўлгач, ёшлар руҳан синиб қолиши ҳам мумкин эди. Шундай паллада танаффус пайти нималар дедингиз?
- Руҳан синмаслигимизга ишонгандик, фақат иккита гол ўтказиб юборганимизда негадир чўчиб ҳаракат қилдик. Олдимизга фалончи ўринни олиш деган аниқ мақсад қўйилмаган. Мақсадимиз - ёшларни тарбиялаб катта футболга етказиб бериш. Танаффус пайти футболчиларга қўрқмай ўйнанглар, ҳисобга қараманглар деб айтдик. Чиройли ўйин кўрсатишга ҳаракат қилдик. Иккинчи тайм бошланганидан 30 сония ўтиб гол уриб олганимиз яхши бўлди, бу бизга қўл келди.
- Таркибдаги ўзгаришлар ҳақида.
- Доим жамоаларда ўзгариш бўлиб туради, бизда ҳам шундай. Кимдир келади, кимдир кетади. Айтганимдек, бизда ўрин олиш бўйича мақсад йўқ. Мақсад - ёшларни тайёрлаш. Бугун сафимизда икки нафар 2010 йилда туғилган футболчи ўйнади. 2009лар ҳам бир нечтани ташкил этади. Бундан ҳам ёш футболчилар келса, уларни ҳам кўрамиз.
- Лазиз Мирзаев жамоага қанчалик қўшилиб кетди?
- Лазиз Мирзаев бизга бегона эмас, аслида у ўзимизнинг ўйинчи. У ёшлигида футболдан кетаман деганида биз имкон бериб "Одил Жуниор"га чақиргандик. Кейинчалик омади келиб ўсмирлар терма жамоасига чақирилди, Англияга гол урди, ҳатто Испанияда фаолият юритиб қайтди. Биз уни ёшлигидан тарбиялаб келганмиз. Мирзаев ўзимизнинг йигит, шу боис жамоага қўшилиб кетиши қийин кечмади.
- Бундай "камбэк" ёшларнинг руҳан ўсишига сабаб бўладими?
- Юз фоиз. Бунга ишончим комил. Болага босим қилсангиз, у чўкиб бораверади. Бизда эса ундай босим йўқ. Майдонга чиқиб бемалол ўйнанглар деймиз. Ёшларнинг салоҳиятини ўйинлар орқали билиб оламиз. Бугун ҳеч ким ёмон ўйин кўрсатмади.
