"Ўйин оғир бўлди. Кубок баҳслари барча Суперлига жамоалари учун қийин кечмоқда. Бугун бош мураббийимиз Миржалол Қосимовнинг йўқлиги бизга қўшимча масъулият юклади. Умуман олганда, яхши ўйин бўлди. Хатолар устида ишлаймиз. Асосийси кейинги босқичга чиқиш вазифасини уддаладик. Йигитларга раҳмат айтаман", - дея гап бошлади Хайрулло Каримов.
- "Арал" жамоасининг кейинги босқичга чиқиш имкониятлари йўқ эди. Шунинг учун ОКМКда менсимаслик кайфияти бўлмадими?
- Йўқ. "Арал" жамоаси қандай эканлигини билардик. Улар яхши югурадиган жамоа. Бош мураббиймиз ҳам бу ҳақда айтганди. Лекин ҳар доим хотиржамлик бўлади. Йигитлар ортиқча хотиржамликка берилиб юборишади. Шунинг учун ҳам "Металлур"га қарши ўйинда ғалабани сақлаб қола олмадик. Кўп гол ўтказиб юбораётганимиз кўнгилни хира қилмоқда.
- Кейинги учрашувларда янги футболчиларни майдонга кўришимиз мумкинми?
- Биз ҳеч кимни ажратмаймиз. Таркибимизда бекорга 21та футболчи бор эмас. Ўйин куни қайси футболчининг ҳолати яхшироқ бўлса, шундан келиб чиқиб қарор қабул қиламиз. Футболчи машғулотда ўзини кўрсатиши керак. Миржалол аканинг талабларини биласизлар.
