Эслатиб ўтамиз, ўтган жума куни Вирджиния Фонсека "Реал" вингери билан ажрашганини эълон қилган, душанба куни эса Винисиус ҳам бу хабарни тасдиқлаган эди. Шунга қарамай, эртаси куниёқ инфлюенсер ижтимоий тармоқларда бир маймунни лабидан ўпиб турган видеосини жойлаштирганди. Видеода кимдир "ўпиб қўй, ўпиб қўй" дейди, у эса кулиб: "Мана буни ўпич деса бўлади!" - дея жавоб қайтаради.
Винисиуснинг обуначилари ушбу постни футболчига нисбатан атайлаб қилинган ҳужум деб баҳолашди. Мухлислар "Реал" юлдузи Испанияда доимий равишда ирқчиликка учраб, уни "маймун" деб ҳақорат қилишларини эслатиб ўтишганди.
"Бизнинг етти ойлик жуда гўзал муносабатларимиз бўлди. Мен бу муносабатларни чин дилдан ҳурмат қиламан ва ҳеч қачон, ҳеч қандай ҳолатда уни камситадиган ёки ҳақорат қиладиган ишга қўл урмаган бўлардим. Ҳеч қачон, бу менинг табиатимга ёт нарса.
Постни жойлаштириш вақти нотўғри бўлганини ва одамлар буни нотўғри тушунишганини англаб турибман. Аммо мен бундай қарашларга мутлақо қаршиман. Инсонлар бу қадар беъмани таққослашни ўйлаб топишлари хаёлимга ҳам келмаганди.
Ушбу видеодан хафа бўлган барчадан узр сўрамоқчиман. Лекин илтимос, шуни билингки, мен доим шундай қилганман: ўтган йили ҳам маймунни ўпгандим, у бунга ўрганиб қолган. Унинг исми Мико, агар "ўпиб қўй" десангиз, у сизни ўпади.
Мен ҳар қандай ирқчилик руҳидаги изоҳларга қатъиян қаршиман. Винини доимо қўллаб-қувватлайман, у ажойиб инсон ва бундай қийинчиликларни бошдан кечиришга лойиқ эмас", - деди Фонсека.
