– Тайёргарлик жараёни қандай ўтмоқда?
– Ўзингиз кўриб турганингиздек, тайёргарлик жараёни яхши кечмоқда. Ўзимизга керакли юкламаларни оляпмиз ва кўпроқ жисмоний ҳолатимизни яхшилашга эътибор қаратмоқдамиз. Тўғри, легионерларимиз ҳозирча сафимизда эмас, лекин шунга қарамай, Жаҳон чемпионатига муносиб ҳолатда етиб бориш учун уларсиз ҳам машғулотларни тизимли равишда олиб боришимиз зарур.
Шахсий ҳолатимга келсак, у жуда яхши. Жамоа тўлиқ йиғилгунга қадар ҳам индивидуал машғулотлар ўтказдик ва формамизни анча тиклаб олдик. Йиғин бошлангандан сўнг кичик жароҳат сабабли бироз вақт якка тартибда шуғулланишимга тўғри келди. Бироқ ҳозир барчаси жойида ва бемалол умумий гуруҳда, жамоадошларим билан биргаликда машғулотларда иштирок этяпман.
– Терма жамоамиз йиғинига 40 га яқин ўйинчи жалб этилди, Жаҳон чемпионатининг якуний қайдномасидан эса 26 нафар футболчи ўрин олади. Бундай кучли рақобат муҳити жамоага қандай таъсир кўрсатмоқда?
– Биринчи ўринда шуни таъкидлаш керакки, рақобатнинг борлиги жуда яхши ҳолат. Чунки рақобат мавжуд бўлган жойда ҳар бир ўйинчи ўзининг максимал имкониятларини ишга солишга ва борини беришга ҳаракат қилади. Бу эса бутун жамоамиз учун фақат фойда келтиради. Қолаверса, футболчилар ўзларини энг юқори даражада кўрсата олса, бу мураббийлар штаби учун ҳам якуний таркибни танлаш жараёнини осонлаштиради. Шу сабабли биз буни мутлақо "нормал" ҳолат деб қабул қиламиз ва бундан фақат хурсандмиз.
Хорижлик мухбир (Португалия): – Мен португалияликман, шу сабабли бўлажак турнирдаги рақибингиз ҳақида савол бермоқчи эдим. Португалиядаги мухлислар Ўзбекистон терма жамоаси ҳақида етарлича маълумотга эга эмаслар. Португалияликлар Ўзбекистон терма жамоасидан қандай ўйин кутишлари мумкинлиги ва ўзингизнинг ушбу баҳслардан умидларингиз ҳақида қисқача айтиб ўтсангиз.
– Энг аввало, биз ўз жамоамизни ва ўйинимизни кўрсатамиз. Португалия, Колумбия ва Конго терма жамоалари учун биз майдонда ўзига хос "бошоғриқ" бўлишга ва кучли қаршилик кўрсатишга ҳаракат қиламиз.
– Айни пайтдаги машғулотларда асосий эътибор нимага қаратилмоқда? Кўпроқ ҳужумкор ўйин услуби устида ишланяптими ёки ҳимоявий тактикагами?
– Ҳозирги машғулотларимиз жараёнидан келиб чиқиб айтадиган бўлсам, биринчи навбатда жисмоний тайёргарлигимизни энг юқори чўққига олиб чиқиш устида ишлаяпмиз. Чунки олдинда бизни дунёнинг энг кучли жамоаларига қарши ўйинлар кутиб турибди. Бундай рақиблар билан муносиб курашиш учун, энг аввало, жисмоний ҳолатимиз бенуқсон бўлиши талаб этилади. Шундан сўнггина тактик ва техник жиҳатларимизни янада такомиллаштиришга ўтамиз. Лекин ўзимизнинг тактик-техник салоҳиятимизни майдонда тўлиқ намойиш этишимиз учун ҳам, биринчи ўринда жисмоний имкониятларимиз белгиланган талабларга тўлиқ жавоб бериши шарт.
