Ўшанда Роналду ўзбекистонлик ёш футболчилар билан бирга майдонга чиқиб, тўп сурган ва ўзининг бой тажрибаси билан ўртоқлашган эди. Бу ташриф академия тарбияланувчилари учун ҳақиқий байрамга ва бир умрлик унутилмас хотирага айланган. Улар орасида бугунги кунда Ўзбекистон терма жамоаси билан жаҳон чемпионатида иштирок этаётган Рустам Ашурматов ва Достон Ҳамдамов бор эди.
2026 йилги Жаҳон чемпионати Ўзбекистон миллий терма жамоаси учун ўзгача аҳамият касб этмоқда. Мусобақа доирасида вакилларимиз жаҳоннинг энг кучли жамоаларидан бири – Португалия терма жамоасига қарши майдонга тушади. Ушбу учрашув нафақат миллионлаб мухлислар, балки болалигида Роналду билан бир майдонда тўп тепган ва бугунги кунда терма жамоамизнинг асосий ўйинчиларига айланган футболчиларимиз учун ҳам жуда муҳимдир.
Рустам Ашурматов:
"Роналдунинг ташрифи кутилмаган ҳодиса бўлганди. У Ўзбекистонга келиб, биз билан футбол ўйнаган. Ўшанда биз 13 ёшда эдик. Шундан бери кўп нарса ўзгарди. Улғайдик, тажриба орттирдик ва кўплаб учрашувларда майдонга тушдик. Энди эса майдонда нафақат Роналдуга, балки бутун Португалия терма жамоасига қарши тўп тепамиз. Биз доимо Жаҳон чемпионатида иштирок этишни орзу қилганмиз ва ҳар қандай юлдузга қарши ўйнашга тайёрмиз. Энди биз шу ердамиз. Бутун халқ бизга ишонмоқда. Майдонга тушиб, мардонавор ҳаракат қилишимиз ва бор маҳоратимизни кўрсатишимиз керак. Биз энди 13 ёшли болакай эмасмиз. Дастлабки учрашувдаёқ гол урганимиз бизга янада кўпроқ иштиёқ ва ишонч бағишлади. Кейинги ўйинларда фақат ғалаба учун майдонга тушамиз. Роналду келган пайтлари биз футбол нима эканлигини эндигина кашф қилаётган эдик. Ҳозир эса Жаҳон чемпионатидамиз".
Достон Ҳамдамов:
"Бу унутилмас лаҳза эди. Ўша пайтларда Роналду ўз шон-шуҳратининг энг чўққисида эди. Бор кучимизни ишга соламиз. Муносиб қаршилик кўрсатамиз. Роналду – менинг кумирим. Унга қарши майдонга тушиш – орзуимнинг ушалиши. Бироқ Португалияга қарши ўйин бошлангач, у қаҳрамоним эмас, балки рақибимга айланади".
