— Чемпионлар Лигаси "Барса"нинг бош мақсади эканини ҳеч ким яширмайди. Кийиниш хонасида ва машғулотларда кўраётганларингиздан келиб чиқиб, ушбу совринни қўлга киритишни жорий мавсумдаги реал вазифа деб ҳисоблайсизми?
— Ҳа, буни мутлақо реал мақсад деб биламан. Бу жамоа сифатида нималарга қодир эканимизни бутун Европага кўрсатиш ва эътироф этилиш учун охирги қадам. Шу билан бирга, бизни фаворит деб ҳисобламайман.
Биз қандай йўлни босиб ўтганимизни ва чемпион бўлиш учун нима талаб этилишини тушунишимиз керак. Ушбу даражага чиқиш учун жамоамиз яна айрим жиҳатларни тўғрилаб олиши лозим. Мен каби футболчилар айнан шунинг учун ҳам бу ерга келишган — биргаликда ўсиш ва Чемпионлар Лигаси каби ноёб турнирларда ғалаба қозониш учун зарур бўлган сифатларни жамоага олиб кириш.
Чемпионлар Лигаси — шунчаки энг кучли жамоани аниқлаб берадиган турнир эмас. Бу алоҳида эпизодлар ва лаҳзалар ҳал қилувчи аҳамиятга эга бўлган мусобақадир. Менимча, айнан шу жиҳатдан жамоамиз янада ўсиши керак. Муваффақият имкониятларига келсак... Мен бу ерга айнан шунинг учун келганман.
— Агар аниқ ўйин жиҳатлари ҳақида гапирадиган бўлсак, айнан нималарни мукаммаллаштириш керак? "Барселона"да ҳамма нарса қандай содир бўлишига гувоҳ бўлдик: "Атлетико"га қарши биринчи ўйинда марказий ҳимоячининг майдондан четлатилиши ва иккинчисида яна бир қизил карточка, "Интер" билан сафардаги ўйин (ҳисобда олдинда бориб, якунда мағлуб бўлинган), икки ўйин натижасига кўра урилган олтита ва ўтказиб юборилган еттита тўп...
— Сиз айнан нишонга урдингиз. Ҳамма нарса плей-офф ўйинларидаги, айниқса энг муҳим учрашувлардаги ҳал қилувчи лаҳзаларни тўғри бошқара олиш маҳоратига бориб тақалади. Қизил карточкалар, пенальтилар, кераксиз ўтказиб юборилган голларнинг олдини олиш — айнан шу омиллар турнирда қолaсизми ёки чиқиб кетасизми, шуни белгилаб беради.
Менимча, ҳужумда ақл бовар қилмас қудратга интилгандан кўра, барқарор ва ишончлироқ ҳаракат қилган маъқул. Ғалаба қозонган жамоалар буни амалда исботлашган. Айнан шу борада ишлашимиз керак бўлган жиҳатлар бор. Лекин буларнинг бари тажриба билан келади. Мен ҳар доим айтганман: ғалаба қозониш учун аввал мағлуб бўлиш ва ундан сабоқ чиқариш керак. Йирик совринларни қўлга киритган футболчилар буни яхши билишади.
Мен ниҳоят бу мусобақада зафар кучгунимга қадар Чемпионлар Лигасида сан-саноқсиз маротаба ўйнаганман, шунинг учун бу тажриба таълим олиш жараёнини англатишини ва футболчилар ҳар йили янги нарсаларни ўрганишини жуда яхши тушунаман, — деди "Олтин тўп" соҳиби.
