Championat.asia сайти турнинг энг яхшиларини аниқлади.
Тур мураббийи — Илёс Қурбонов (“Металлург”)
Маълум сабабларга кўра, “Олимпик-MobiUz” ва “Металлург” ўртасидаги баҳс қолган ўйинларга нисбатан анча эрта, 2 сентябрь куни ўтказилди. Унда “Металлург” 3:2 ҳисобида зафар қучди. Илёс Қурбонов шогирдлари ишончли ўйин кўрсатди ва муносиб равишда ғалабани ўзиники қилди. Championat.asia ходимлари айнан Қурбоновни энг яхши мураббий дея эътироф этди.
Тур футболчиси — Марко Миличкович (“Металлург”)
“Металлург”нинг черногориялик ярим ҳимоячиси Марко Миличкович“Олимпик-MobiUz” билан тўқнашувда шунчаки яйради ва хет-трикни расмийлаштириб, жамоасининг ғалабасини таъминлади (3:2). Шу тариқа, ортиқча муҳокамаларсиз Миличкович тур футболчиси сифатида қайд этилди.
Тур дарвозабони — Мирзоҳид Жалилов (“Яйпан”)
“Яйпан” бу турда сафарда “Ғазалкент” билан тўқнаш келиб, дарвозаси дахлсизлигини сақлаб қолди (0:0). Бунда жамоа дарвозабони Жалиловнинг ўрни катта. У баҳс мобайнида бир қатор вазиятларда жамоаси жонига ора кирди. Айниқса, у иккинчи бўлимдаги сэйвлари орқали жамоаси дурангга эришишида муносиб ҳисса қўшди. Шундай қилиб, айнан Жалилов тур дарвозабони бўлди.
Тур голи — Марко Миличкович (“Металлург”)
Юқорида таъкидланганидек, “Металлург” хавбеки Марко Миличкович “Олимпик-MobiUz” билан учрашувни ўз бенифисига айлантириб юборди. Унинг 29-дақиқада майдон марказидан тепган тўпи дарвоза тўридан жой олди. Миличкович дарвозабон олдинга чиқиб кетганини пайқади ва олис масофада бўлишига қарамай, тўғридан-тўғри дарвозани нишонга олди. Шу тариқа, айнан шу гол турдаги энг чиройлиси сифатида эътироф қилинди. Қуйида мазкур голни томоша қилишингиз мумкин.
