- Ўйин ҳақида фикрингиз?
- "Лочин"га қарши баҳсда кўплаб вазиятларга эга бўлдик, фақат ҳужумларни якунлашда оқсадик. Ўйин асосан жамоамиз назорати остида кечди. Кўплаб вазиятлар яратдик, лекин сен урмасанг сенга уришади деганларидек рақиб қарши ҳужумдан унумли фойдаланди. Биринчи таймда икки-уч вазиятни голга айлантира олмадик. Иккинчи таймда ҳам кўплаб имкониятларга эга бўлдик. Баҳс эса 1:1 ҳисобида якун топди. Ишлайдиган жиҳатларимиз кўп, муаммоларни биламиз. Энди кейинги ўйинга ҳозирлик кўрамиз.
- "Металлург" биринчи даврада "Лочин"ни 5:0 ҳисобида мағлуб этганди. Балки бугунги ўйин олдидан бемалол ютамиз деган фикр бўлгандир?
- Йўқ, бундай фикрга бормадик. Биз бу ҳақда ўйламадик ҳам. "Лочин" қандай жамоа эканини биламиз, бежизга турнир жадвалининг юқори ўринларида бораётгани йўқ. Мавсум охири бўлгани учун футболчиларимизда чарчоқ кузатиляпти. "Ғазалкент" билан баҳсда ҳам кўп куч йўқотдик. Менимча, биз шу ўйиндан кейин яхши тиклана олмадик. Бу менсимаслик эмас, балки чарчоқ билан боғлиқ.
- "Металлург" олдига Суперлигага чиқиш вазифаси қўйилган. Фараз қилинг, "Металлург" Суперлигага қайтди ва таркибга "Лочин" жамоасидан кимларни чақирган бўлардингиз?
- "Лочин" жамоасидаги 22-рақамли Сардорбек Саидов яхши ҳаракат қилар экан. Шу ўйинчининг ҳаракатлари кўпроқ ёқди.
- Ўйиндан олдинги кўрсатмалар қандай эди?
- Биз доим ғалаба учун майдонга чиқамиз ва шу бўйича кўрсатма берамиз. Бош мураббий бўлганимдан бери ҳали ютқазмадик. Ҳар бир баҳсга максимал натижани кўзлаб чиқамиз. Фақат чарчоқ борлиги чатоқ бўляпти. Шунга қарамай, бугун беш-олти марта юз фоизли вазият ярата олдик.
- Сафар ўйинига "Металлург" фан клуби ҳам ташриф буюрди. Мухлисларнинг қўллаши қанчалик таъсир қилди?
- Фан клубимизга алоҳида раҳмат айтмоқчиман: шунча йўл босиб шу ергача келишди. Қаерга бормайлик, мухлисларимиз доим биз билан бирга ва жамоани қўллаб туришибди. Фан клубимизни бемалол 12-ўйинчимиз дея оламан.
- Жамоангиз гол ўтказгач, ичингиздан нималар ўтди?
- Вазиятни ўнглай олишимизга охиригача ишонгандим. Чунки ўйиннинг боришидан устунлик асосан биз томонда эканлиги кўриниб турди. Футболчиларимиз даражаси баланд дея оламан. Кўплаб вазиятлар бўлди, фақат гол уриш керак эди холос. Ғалаба қозониб кетишимиз ҳам мумкин эди.
