Championat.asia sayti turning eng yaxshilarini aniqladi.
Tur murabbiyi - Ilyos Qurbonov (“Metallurg”)
Ma'lum sabablarga ko'ra, “Olimpik-MobiUz” va “Metallurg” o'rtasidagi bahs qolgan o'yinlarga nisbatan ancha erta, 2 sentyabr kuni o'tkazildi. Unda “Metallurg” 3:2 hisobida zafar quchdi. Ilyos Qurbonov shogirdlari ishonchli o'yin ko'rsatdi va munosib ravishda g'alabani o'ziniki qildi. Championat.asia xodimlari aynan Qurbonovni eng yaxshi murabbiy deya etirof etdi.
Tur futbolchisi - Marko Milichkovich (“Metallurg”)
“Metallurg”ning chernogoriyalik yarim himoyachisi Marko Milichkovich“Olimpik-MobiUz” bilan to'qnashuvda shunchaki yayradi va xet-trikni rasmiylashtirib, jamoasining g'alabasini taminladi (3:2). Shu tariqa, ortiqcha muhokamalarsiz Milichkovich tur futbolchisi sifatida qayd etildi.
Tur darvozaboni - Mirzohid Jalilov (“Yaypan”)
“Yaypan” bu turda safarda “G'azalkent” bilan to'qnash kelib, darvozasi daxlsizligini saqlab qoldi (0:0). Bunda jamoa darvozaboni Jalilovning o'rni katta. U bahs mobaynida bir qator vaziyatlarda jamoasi joniga ora kirdi. Ayniqsa, u ikkinchi bo'limdagi seyvlari orqali jamoasi durangga erishishida munosib hissa qo'shdi. Shunday qilib, aynan Jalilov tur darvozaboni bo'ldi.
Tur goli - Marko Milichkovich (“Metallurg”)
Yuqorida takidlanganidek, “Metallurg” xavbeki Marko Milichkovich “Olimpik-MobiUz” bilan uchrashuvni o'z benifisiga aylantirib yubordi. Uning 29-daqiqada maydon markazidan tepgan to'pi darvoza to'ridan joy oldi. Milichkovich darvozabon oldinga chiqib ketganini payqadi va olis masofada bo'lishiga qaramay, to'g'ridan-to'g'ri darvozani nishonga oldi. Shu tariqa, aynan shu gol turdagi eng chiroylisi sifatida etirof qilindi. Quyida mazkur golni tomosha qilishingiz mumkin.
