Миржамол Қосимов: "Миржалол Қосимов жамоасида бўлиш босими йўқ. Аксинча, бу интилишга туртки беради"

– Йиғин қандай ўтмоқда?

– Икки маҳал машғулот ўтказяпмиз: эрталаб ва кечқурун. Шундай пайтлар бўлдики, эрталаб машғулот қилиб, кечқурун ўйин ўтказдик. Ҳаммаси жой-жойида кетяпти. Чемпионатни 100 фоиз тайёр ҳолда бошлаймиз.

– Адашмаётган бўлсам, Туркияда йиғин ўтказаётганлар орасида, менимча, фақатгина ОКМК мағлубиятга учрамаган жамоа бўлиб турибди. Бу каби ўйинлар албатта натижага қаралмайди. Жамоани ҳар томонлама, турли мактаб вакиллари билан ўйинлар кучайтириб боради...

– Таъкидлаганингиздек, ўқув-машғулот йиғинларида натижага қаралмайди. Нимага десангиз, чемпионатга битта йўналишда тайёрланиш бўлмайди. Бу ерда икки хил, уч хил тактика синаб кўрилади. Учрашувлар давом этаётган пайтда ўйин схемаси ўзгариб кетади. Шунинг учун ҳар хил схема синовдан ўтказилади. Энг асосийси – футбол ўйнаш, сифат ва ўша учта-тўртта режани яхшилаб мукаммал ўрганиб олиш деб ўйлайман. Шунинг учун ҳам йиғинларда беллашувлар ўтказилади.

– Гоҳида бир кунда иккита ўйин ҳам ўтказиляпти ва барчага имконият ҳам бериляпти.

– Албатта. Йиғинда ҳамма бир хил юклама олиши керак. Бир хил тайёр бўлиб бориши керак. Нимага десангиз, чемпионат узоқ давом этади. Жуда узоқ давом этади. Бир ҳафта, бир-икки ой эмас. Чемпионатда ҳар хил вазият бўлади. Шунинг учун ҳаммага юклама бир хил деб бўлсин, ҳамма ўйин амалиётига эга бўлсин деб шунақа қилинади деб ўйлайман. Бу менинг фикрим.

– Мухлислар стандартдан киритиладиган голларни анча соғиниб қолишган...

– Насиб қилса ҳаракат қиламиз.

– Миржалол Қосимов мураббийлик қилаётган ОКМКда бошқа футболчиларга қараганда сизга кўпроқ босим бўладими?

– Ҳаммаёқда шу савол берилади. Жуда кўп берилади. Ҳозир босим йўқ. Кўникиб қолганман. Аксинча босим туртки беради. Ҳар доим шуни айтиб келганман. Буни тўғри қабул қиламан ва олдинга интилишга ҳаракат қилавераман.

– ОКМК мухлисларига тилакларингиз...

– Қўллаб-қувватлашда давом этинглар, бизга ишонинглар. Ишончингизни оқлаб, чемпион бўлиб, сизларни хурсанд қиламиз.