Мадрид дербисида Мигель Анхель Ортис Ариас бош ҳакам сифатида ишлади. 37-дақиқада Жуд Беллингем подкатда Кристиан Ромерони йиқитди. Ариас "Реал" ярим ҳимоячисига сариқ карточка кўрсатди, аммо такрорий лавҳани кўргач, уни бекор қилди ва "Атлетико" ҳимоячисини огоҳлантирди, чунки аргентиналик футболчи рақибининг тизидан малгина пастроқ қисмига бутсасининг тишлари билан босган эди. Биринчи бўлим охирида "Атлетико" ярим ҳимоячиси Ли Кан Ин Федерико Вальвердега қарши қўполлик ишлатгани — унинг тўпиқ қисмига бутсаси билан зарба бергани учун ҳеч қандай карточка олмади. 49-дақиқада "Реал" ҳимоячиси Дин Хёйсен ўз жарима майдони ичида "Атлетико" вингери Жулиано Симеонени қўлидан ушлаб қолди. Аргентиналик майдонга йиқилди, ҳакам пенальти белгилади ва Хёйсенга сариқ карточка кўрсатди. Вазиятни такроран ўргангач, рефери испаниялик футболчини майдондан четлатди.
"Ҳа, бу биз учун ортга ташланган қадам. Жуда оғир бўлди, биз ғалаба қозонишни истагандик ва бу қандай ўйин бўлишини тушуниб тургандик. Аммо жамоа бор кучини берди ва биз олдинга ҳаракат қилишда давом этамиз — олдинда узоқ мавсум бор ва биз тўғри йўналишда давом этишимиз керак.
Мен ҳеч қачон ҳакамлар ҳақида кўп гапирадиган футболчи бўлмаганман ва ҳозир ҳам буни бошламоқчи эмасман. Фикрим бор, аммо уни ўзимда қолдираман. Бу менинг услубим эмас ва ҳеч нарсани ўзгартирмоқчи эмасман.
Ҳакамлар ҳам одам, улар ҳам хато қилишади ва ҳақиқатан ҳам хатолар бўлди, аммо мен бу мавзуга чуқур кириб бормоқчи эмасман.
Биз меҳнат қилишимиз ва кўпроқ ҳаракат қилишимиз керак. Бошқалар гапириши мумкин, аммо биз “Реал”га аввалги ёрқинликни қайтариш ва яна кубокларни қўлга киритишни бошлаш учун ҳаракат қилишимиз, меҳнат қилишимиз шарт", — деди Мбаппе.
